هل عندك الاجابات المناسبة لأسئلة صغارك؟
كيفاش جيت للدنية؟ علاش يلزمني ناكل الخضرة؟ علاش يلزمني نمشي للمدرسة؟ كيفاش تكون العالم؟ علاش وكيفاش, كلمتين يبداو بيهم الصغار أسئلة ما توفاش يسألوهم أول ما يتعلمو النطق وبعضها ماعندناش ليها أجوبة. الفضول عند الصغار هو دليل على الذكاء لكن التعامل مع اسئلة الصغار حاجة حساسة برشا وتنجم تأثر على مدى ذكاء صغيرك في المستقبل.
اذا كان صغيرك بدى في طرح الاسئلة, هذوما نصائح يعاونوك في الاجابات:
1) ما تقلوش يزي من الاسئلة:
مهما كان عدد الاسئلة اللي يطرحها صغيرك وصعبها , ما تسكتوش وما تقلوش يزي من الاسئلة على خاطر هذا ينجم يخليه يفقد ثيقتو في روحو ويتردد باش يسأل على المعلومة, في المقابل تنجم تأجل الاجابة على بعض الاسئلة لوقت لاحق. تنجم تغير نظرتك لأسئلة صغيرك, في عوض ما تراها حاجة مزعجة تنجم تغزرلها كدليل على ذكاء ولدك وتعطشو للمعلومات.
2) ما تخافش باش تقول ما نعرفش:
أسئلة الصغار غالبا ما تكون ساهلة في البداية لكن مع العمر تبدى تتدرج حتى توصل لأسئلة وجودية وأسئلة صعيب تخطر على بال الوالدين. الصغير يرى والديه مصدر للمعلومات وبالنسبة ليه هوما يعرفو كل شي, لذلك من المهم نعطيوهم معلومات صحيحة باش تبقى راسخة في ذهنهم. أما رد بالك تعطي معلومة غالطة للصغار وقت اللي ما يكونش عندك اجابة صحيحة أو ماكش متأكد من الاجابة, من الافضل أنك تقول “ما نعرفش أما توا نبحثو في المعلومة مع بعضنا” هذا ينمي ثقة الصغير فيك وفي روحو ويخليه يبحث في الحاجات اللي يحب يفهمها.
3) خصص وقت للإجابة على الاسئلة:
ساعات الوالدين يكونو تاعبين, بعد نهار كامل من التعب والخدمة ما يكونش عندهم الرغبة باش يجاوبو على سلسلة من الاسئلة يطرحوها أولادهم. ينجمو الوالدين يخصصو وقت مع أولادهم للحوار والاجابة على أسئلتهم الكل, ينجم يكون بعد العشاء , قبل النوم والا وقت يوصلو هم للمدرسة. كيما ينجمو يعملو ليستة بالاسئلة اللي باش يبحثو فيهم مع بعضهم, على خاطر الصغير ما ينساش ويبقى يستنى في الاجابة.
ارضاء فضول صغيرك للمعرفة مهم برشا أما يلزمو يكون بمعلومات صحيحة.
سارة البلومي