هل صغيرك عندو صعوبات في التعلم؟
فما صغار بمجرد خروجهم من القسم ينساو كل شي قراوه, وما يتعلموش بنفس نسق باقي التلامذة اللي في عمرهم. بعض الأولياء يمشي فيبالهم أنو الصغار هذوما يعانيو من مشاكل في الذاكرة أو في التركيز, لكن في الحقيقة الصغار هذوما يعانيو من مرض “ديسلاكسيا” أو الصعوبات الخصوصية في التعلم.
شنوة هي الصعوبات الخصوصية في التعلم وكيفاش نعاونو صغارنا باش يتخلصو منها؟ هذوما بعض الطرق والمعلومات حول الصعوبات الخصوصية في التعلم حسب موقع ” الصندوق الدولي للأدب” و الطبيبة النفسية “مريم بوداني”.
1) الصعوبات الخصوصية في التعلم :
موش أي صعوبة في التعلم هي صعوبات خصوصية في التعلم, فما صغار ما يتعلموش فيسع بسبب مشاكل في النظر , السمع أو في التركيز أو حتى مشاكل النفسية. الأعراض غالبا ما تكون صعوبة في تهجية الكلمات, النطق المتأخر, صعوبة في الكتيبة, صعوبة في تذكر ومعرفة الحروف والالوان.
اذا كان ما تمش تشخيص صعوبات التعلم في عمر صغير والتعامل معاها بالصحيح تنجم تبقى متابعة الصغير حتى يكبر.
2) كيفاش نتعاملو مع الصعوبات الخصوصية للتعلم:
- القراءة بصوت عالي: ديما شجع صغارك باش يقراو بصوت عالي باش تنمي مهارتهم في القراءة وتجميع المعلومات وحفظ المفردات, تنجم زادة تسمعهم كتب ملخصة صوتيا.
- أعطيهم وقت للراحة: ما تكدسش المعلومات لصغيرك, قلص في ساعات الدراسة وخليه ياخذ وقتو في الراحة وكل مرة راجع الحاجات اللي تعلمهم.
- احتفل بنجاحو: قدر أي مجهود يعملو صغيرك واحتفل بيه باش تشجعو على القراية والتعلم أكثر.
- ما تستناش من صغيرك يتعلم حاجات أكبر من طاقتو, خليه يتعلم الأساسيات والمعلومات اللي يستحقها في حياتو اليومية.
- خلي صغيرك يباشر طبيب نفسي و طبيبة تقويم نطق باش تعاونو على التعلم والنطق الصحيح.
لأكثر معلومات, تفرجو في الفيديو.
سارة البلومي