كيفاش تتعامل مع ضغط الإمتحانات ؟
ديما التحضير للإمتحانات حاجة مرهقة و تعبو فكرة أنو الاختبارات هذه هي التي باش تحدد مسيرتك المهنية مستقبلا تزيد من مستويات القلق والتوتر اللي تحس بيهم. التوتر والقلق ينجمو يأثرو سلبيا على أدائك المعرفي، برشا حاجات تخلي الطالب معرض للإجهاد والتوتر وقت الامتحانات. توتر الامتحانات أو الـ Exam Stress هو نوع من القلق والإجهاد الناجم عن الضغط الدراسي اللي يزيد على وجه الخصوص في فترة الامتحانات. هو إستجابة طبيعية للضغط ومرات يكون حاجة باهية و يعاونك على التركيز ، لكن زيادتو تعطي مفعول عكسي.
1-أسباب التوتر قبل الإمتحانات
- الخوف من الفشل
- الشعور بأنو موش مستعد للإختبار
- الرغبة الشديدة في تحصيل أعلى العلامات.
- قلة الوقت المتاح للدراسة.
- الحاجة للحصول على نتيجة محدّدة
- الشعور بالضغط من عائلاتهم بضرورة تحصيل معدّلات وعلامات عالية.
2-خطوات عملية للتغلب على توتر الامتحانات
ماتركزش على كمية الدروس لكن على النوعية يعني أقرا بذكاء و حاول تبني استراتجية منظمة للمراجعة .
أول حاجة لازمك تختار الوقت الي تنجم تكون فيه مركز اكثر من أي وقت اخر و يكون عقلك فيه قادر انو يستوعب المعلومات و يخزنها. من أهم الطرق الأخرى هي انك تراجع نماذج من امتحانات قديمة و تستنتج أهمية النقاط الي يركزو عليها الأساتذة و المعلمين . من المهم زادا انك تطور مهاراتك في القراءة و الاستماع و القدرة على التحليل و التفكير .
و من الأغلاط الي لازمك تتجنبها هي أنك تخلي الدروس تتراكم عليك و تراجعها ليلة الامتحان ، الطريقة هذه تنجم تتسببلك في الارهاق و تخليك تستهلك طاقتك الكل و بالتالي تفقد القدرة على التركيز .
إهتم بصحتك النفسية و الجسدية, الغذاء المتوازن و ممارسة الرياضة حاجتين ينجمو يعطيوك الطاقة الكافية بش تقرا وقت أطول. فمن المستحسن انك تتمشى لمدة ساعة كل يوم تاكل ماكلة صحية و تبعد على الأكلات المعلبة و الحاضرة الي تخليك تحس بارهاق و فشلة.
انك ترقد 8 سوايع في الليل هي زادا من العوامل الي قادرة تخلصك من التوتر في فترة الامتحانات و تشحن طاقتك من الأول و جديد و تحافظ على المعلومات الي تخزنت في ذاكرتك. من الحاجات الأخرى المهمة الي قادرة تخلصك من القلق النفسي هي انك تحاول تسترخي و تتنفس بطريقة صحيحة و تستقبل طاقة ايجابية لجسمك و عقلك.
بلسم العابد