هذي كانت كلمتهم !
شبكة إنجح إستقبلت مئات التوانسة الناجحين في مختلف المجالات, من كل الأعمار , بنات و أولاد و رجال و نساء , صغار و كبار ..منهم إللي كان في مجالو الأول في تونس و إفريقيا و منهم إللي إخترعو إختراعات توجو بيها بجوائز و غيرهم من قصص النجاح الملهمة.
اليوم نقدمولكم أهم ما قالوه في مقابلاتنا معاهم :
“ساعات نشوف أشخاص على الفايسبوك كيفاش تجيهم حالات يأس من الدنيا و نقول ماعادش عيني باش نكمل حياتي ,أنا نقول ماصاب يجي يتفرج فيا خاطر حياتي أنا وحدها كان نحكاها للناس و يتفرجوا فيها تاو أي إنسان يكون ضعيف يندم على أي لحظة عجز فيها على خاطر أنا معناها تخلقت لاباس عليا و يصيرلي حادث في عمر العشرين سنة أحلى عمر فيا و تخليت على برشا حاجات و وقفت و جيت و ضحيت -و تحديت الإعاقة متاعي و دخلت للرياضة و نجحت فيها و تفوقت و هذا الكلو ما أيستش .. شوف إنت معناها إنسان معاق على كرسي و صارلو حادث تسببلي في إصابة في إيدي إللي انا اليد إللي نعمل بيها كل شيء بقاتلي يد وحدة في حياتي .”
هنية العايدي: لاعبة في المنتخب الوطني لرياضة المعاقين
رابط الفيديو : https://shortest.link/4Dhz
“أي نجاح في الدنيا هذي وراه برشا صعوبات و برشا ناس تحب تعطلك ,ما تحبكش تقدم لذا إنت لازمك تتحدى هذا الكل و تتحدى كل شيء باش توصل للحاجة إلي تحب عليها .ما يجي حتى شيء بالساهل لازمك تتعب . أنا تعبت برشا باش وصلت للي نحب عليه و مازالت باش نتعب برشا باش نوصل نحقق حلمي .الحاجة إللي تحبها عمرك ما تسيبها . إخدم تاو توصل . كمل في حلمتك الكلنا عنا حلمة من إللي أحنا صغار وإلا حتى كي كبرت لازمك تكبش فيها لين تحققها موش حلمة و من بعد كي تفيق ما تلقى شيء.”
نورس الخلصي : بطلة العالم في الكيغ بوكسينغ
رابط الفيديو : https://shortest.link/4Dhv
“راك باش توصل.. راك باش تنجم .إذا كان إنت تحب على حاجة تحب تعملها راك تعملها مهما كانت لذا سكر وذنيك على الناس الكل و أوصل .”
أماني الشرميطي : صماء مهندسة في الميكاترونيك
رابط الفيديو : https://shortest.link/4DhK
“ما تخليش كلمة تطيحك و ما تخليش كلمة توقفك على كل شيء … أقف على ساقيك و عاود كمل كل شيء.”
مريم الدريدي : صماء مصممة الصور للماركات العالمية
رابط الفيديو : https://shortest.link/4DhK
“الغرام قبل كل شيء. الغرام هو إللي يخليك تقدم ,يخليك تكبش في الخدمة متاعك صدقني ما فرحتش قد الفرحة أني نجحت فيها في المحاماة خاطر حسيت روحي حققت جزء بسيط من الحلمة متاعي و حسيت إللي أنا نجم نفيد روحي و نرتقي بروحي و نعمل مكانة لروحي إجتماعية و نفيد البلاد و نفيد الناس إللي أنا منهم و تولدت محامي و باش نموت محامي.”
حبيب البكوش : محامي على كرسي متحرك
“نصيحتي للي ينسحبو من أول مشكل ما تهربوش بالعكس آمنو برواحكم و ثقوا بأنو الفشل ليس إلا محطة عابرة ما تستناوش الدعم من حتى حد . أدعمو رواحكم برواحكم.”
مصطفى زياتين : مقدم أخبار جزائري
رابط الفيديو : https://shortest.link/4Dhf
” أنا تعلمت أنو السعادة و الفرحة مانستناهاش حتى تجيني .. أنا نخلقها باللي عندي . حاول استثمر على روحك و جرب مرة و إثنين و ثلاثة و كان طحت ألف قوم ألف و واحد.”
لمياء حكيم : أول متحصلة على الدكتوراه من أطفال القمر
رابط الفيديو : https://shortest.link/4DhW
“صحيح أي حاجة فيها جانب إيجابي و جانب سلبي أما المهم ألقى الحاجة إللي تحبها و ألقى الحاجة إللي تحب تعملها و كبش فيها و أوصل خاطر أي واحد عندو الموهبة في وسطو لازم تكتشف الموهبة متاعك شنية و جرب أي حاجة تحبها المهم كبش فيها و أعمل كل شيء باش توصللها صحيح باش يكون صعيب موش بالساهل أما مادامك تحبها راك توصل.”
أمان ميلادي : لاعبة شطرنج محترفة
“حلمي نحب نثبت للمجتمع التونسي و نبدلو نظرتو على ذوي الإحتياجات الخصوصية على خاطر التونسي يغزر لحاملي الإعاقة شخص مسكين يسخف ما ينجمش يعمل حتى شيء . أنا فعليا ننساها الإعاقة ما نحطش روحي أنا من ذوي الإحتياجات الخصوصية بالعكس حاسة روحي نجم نعمل كل شيء نمشي وحدي ناكل وحدي كل شيء نعملو وحدي نسيتها الإعاقة و بيني و بين روحي قلت لازمني نوصل.”
إيمان دبيرة : محاسبة من ذوي الإحتياجات الخصوصية
رابط الفيديو : https://shortest.link/4Dh9
“دخلت للجامعة و أنا عندي برشا أفكار مسبقة لقيت برشا صعوبات إللي يخليوني بالحق مانيش متفائلة معناها كي تلقى روحك إنتي ما تراش و هوما عندهم المصادر عندهم كل شيءو ينجمو و أنا ما عندي شيءلذا من الطبيعي من الأول باش نخاف على الاخر لكن كان عليا طلب العلم و على فضل طلب العلم بيني و بين روحي في اللحظة هذيكا قلت أنا لهنا و لازمني نوصل و خذيت بالأسباب الكل إللي تخليني نوصل وعملت مكتبتي الخاصة ووليت نستعمل في الحاسوب نتواصل مع الأساتذة باش يبعثولي الدروس .أنا نخدم كيما الناس الكل و ساعات زادة أكثر من الناس الكل خاطر تتطلب مجهود أكثر .”
عبير الدوزي : أول كفيفة متحصلة على الماجستير
رابط الفيديو : https://www.youtube.com/watch?v=DvhqODVv29A
” نقول للبنات إخدمو المهم في الطريق الصحيح. إخدم راو الناس ما يعجبهاش العجب خاطر هوما يعرفو رواحهم ماهمش باش يقدمو لذا ما يخليوش غيرهم يتقدم هذي الأولى . الحاجة الثانية نقلهم إخدمو و تدعثرو المرة الأولى و المرة الثانية و المرة الثالثة و المرة الرابعة و بعد تاو توصل لحلمتك . أنا كي دخلت للميدان الحدادة الناس الكل من الأول قالولي لا و رد بالك و زينك و درا شنوة لكن أنا قلت وقت الخدمة خدمةو وقت الزين زين ,هذيكا هي الحياة ..الوقت صعب.. الدنيا صعبت يعني ماناش باش نقعدو و باب الرزق باش يتحل في وجوهنا.”
إكرام دباش : حدادة
رابط الفيديو : https://shortest.link/4QMO
ولاء الحبلي