كيفاش تحضر صغيرك نفسيا للعودة المدرسية ؟
يفصلونا بضعة أيام على العودة المدرسية, وكيف نقولو “تحضيرات العودة المدرسية”, أول حاجة تخطر على بالنا هي الأدوات,الكرطابة والطبلية. لكن أهم حاجة في العودة المدرسية هي التلميذ, اللي باش يغير نظام يومي ستانس بيه لقرابة ثلاثة شهور ويرجع يركز في القراية, التوقيت المدرسي والمعلمين اللي باش يقريوه. لذلك يلزمنا نعرفو كيفاش نحضرو صغارنا نفسيا للعودة المدرسية باش نضمنو نجاحهم خلال السنة الدراسية.
هذوما بعض النصائح تقدمهم الاخصائية النفسية الأمريكية “أيمي دانكن” اللي ينجمو يعاونونا في تحضير صغارنا نفسيا للمدرسة :
1. أحكي مع صغيرك
قبل فترة من العودة المدرسية, أبدا أحكي مع صغيرك على المدرسة, أسألو إذا كان متحمس للعودة لمقاعد الدراسة والا لا, وإذا كان عندو قلق وإلا خوف من الدراسة. هكا تفهم انطباع صغيرك على المدرسة ويكون عندكم الوقت باش تحاولو تتجاوزو المخاوف والا الصعوبات اللي في ذهنو حول الدراسة.
2. خلي صغيرك يتكلم
أعطي فرصة لصغيرك باش يحكي على مشاكلو والا الحاجات اللي يهتملها في الدراسة. أظهر اهتمام كبير باش تسمع أفكارو, تنجم تستغل وقت النزهة والا وقت قبل النوم باش تسمع صغيرك. هذا ينمي مهارات الإبداع والثقة في النفس عند الصغار ويعاونهم باش يواجهو بعض المشاكل اللي تنجم تصادفهم كيما التنمر, التردد في الكلام وصعوبة تكوين الصداقات.
3. هز معاك صغيرك للمكتبة
حماس الصغير للقراية ولإستعمال الادوات المدرسية يزيد يكبر إذا كان يختار أدواتو وحدو. لذلك من المهم اننا نهزو صغارنا معانا للمكتبة لشراء الأدوات. هذا يخليهم يحسو بالإستعدادية والمسؤولية تجاه الدراسة. كيما نجمو نستغلو وقت التسوق باش نفسرو لصغارنا طريقة استعمال الأدوات الكتب الجديدة.
4. خصص مكان للدراسة
الديكور والألوان عندهم تأثير كبير على نفسية صغارنا, لذلك فإنو تخصيص مكتب منظم للدراسة ومكان تعلق فيه المحفظة ينجم يحمس صغيرنا للقراية ويقوي رغبتهم في المطالعة.كيما تحسسهم رؤية الكتب والكرطابة في الدار بقرب موعد العودة للمدرسة.
5. أبدى في تطبيق الروتين الجديد
أكثر حاجة تأثر على نفسية الصغار أثناء العودة المدرسية هي تغيير الروتين اللي ستانس بيه لأكثر من شهرين, وخاصة وقت النوم ووقت الماكلة. لذلك حاول تعود صغيرك على النوم والاستيقاظ بكري وجرب طبق معاه الروتين الجديد باش تعرف المدة اللي يستغرقها تحضيرو للمدرسة. هذا باش يعاونك في إعادة تنظيم وقت صغيرك ويعاونو باش يعرف النظام اليومي الجديد اللي باش يعتمدو طول السنة الدراسية.
خوف الصغير من المدرسة في الأيام الاولى حاجة طبيعية, لأنو مرتبط بالخوف من كل مستقبل مجهول, لكن نجمو نتخلصو منو ببعض التحضيرات النفسية.
سارة البلومي