زعما صحيح الي جسدنا يعكس أفكارنا؟
برشا ناس ماشي في بالهم الي تنجم تعرف كل إنسان و تفهمو كان من كلامو، لكن الحقيقة فما لغة أخرى قادرة انها تعطينا إنطباع على أفكار الشخص الي نتحاورو معاه و الي هي لغة الجسد.
اللغة هذه كي تفهمها تخليك تكون شخص ذكي و متميز على غيرك و تعرف تفرق بين الكذب و الصدق. كيما زادا تنجم تستغلها بش تتواصل بيها مع عباد أخرين و تنجح في أنك تأثر عليهم، و الشيء هذا ينجم يعاونك في علاقاتك الإجتماعية و حتى العملية .
و هذوما حاجات يخليوك تفهم كل شخص من خلال لغة الجسد متاعو
1) العنين ما تعرفش تكذب:
من أهم الحاجات الي لازم تركز فيها في لغة الجسد هي العينين خاتر يصعب على صاحبها انو يتحكم فيها و خزرتو هي الي تحدد طريقة تفكيرو و شنيا يحب يقول بالضبط.
مثلا إذا كان الشخص فرحان ، البؤبؤ متع عينيه يوساعو و العكس صحيح. و إذا كان خزر للجهة اليسار و هو يحكي يعني قاعد يكذب.
2) مشيتك تحدد شخصيتك:
طريقة المشي متاعك هي الي بش تخلي الناس تحكم عليك، اذا انت تمشي و راسك الفوق و بدنك مستقيم ، الحاجة هذه تدل على ثقتك في روحك و قوة شخصيتك و تزيدك جاذبية ، على هذاكا من المهم إنك تمشي بطريقة صحيحة .
3) صوابع اليدين تعكس الحالة النفسية:
إذا كنت تتواصل مع شخص و لاحظ إنو يحرك في صوابع يديه برشا لازمك تفهم الي هو متوتر و ماهوش مرتاح و الحاجة هذه يحاول ليها إنو يهدي بيها روحو من غير ما يعرف الي هي من الحركات الي قادرة إنها تفضح الإرتباك متاعو بسهولة تامة .
عبير العقربي