كيفاه نخبي فلوس من شهريتي ؟

برشا أشخاص تعاني من عدم نجاحها إنها تدخّر فلوس من شهريتها بتعلّة إنو الشهريّة متكفيش لمصاريفها ونفقاتها.

لكن فما طرق مهما كان دخلك متوسّط أو ضعيف يخليك تنجم تخبي فلوس.

تخفيض النفقات

من أكثر الحاجات اللي تخلينا نصرفوا فلوس هي النفقات الزايدة اللي في بعض الأحيان منستحقوهاش. ويقول موقع “انشارح” الأمريكي اللي إشكاليّة الحقيقيّة اللي يعانيو منها برشا ناس مش في حجم المداخيل أما في حجم النفقات. وهنا لازم تسجلّ كل شهر شنوا النفقات الأساسيّة والضروريّة اللي لازم تخلصهم كيما الكراء والفواتير. وتنجم زادة تعمل جوابات كل جواب لخلاص معيّن وتحط فيه قداه الفلوس اللي بش تخلّص بيهم وهكا قبل ما تاخو الشهريّة تبدا على علم قداه نسبة النفقات متاعك.

تخفيض المصاريف

مش كان النفقات تأثر على وضعيتك الماليّة أما زادة المصاريف اليوّميّة عندها دور كبير. تقول مجلة “ريدرز دايجست” الأميركية أنك تحدّد ميزانيتك والالتزام بها هي أول خطوة بش تحقّق إستقلال مالي. لازم تحدّد زادة نفقاتك الضروريّة كيما إنك تهز ماكلة مالدار للخدمة وتبعد على المطاعم وإذا انت متعود إنك تمشي للقهوة كل يوم يلزمك تبعد وهكا تنجم تتدخّر.  

الابتعاد عن الديون

من الحاجات اللي تخلي الشهريّة توفى فيسع هي الديون، وين تلقى اللي نسبة كبيرة منها تخلصّ بيها في أصدقائك اللي تسلّفت منهم. وحسب دراسة عملها المعهد الوطني للاستهلاك الحكومي بتونس في اخر 2018 فإنو 540 ألف أسرة تونسيّة دخلت في دوامة التداين المغلق اللي يعني إنك تتسلّف بش تخلصّ دين قديم، على هاذاكا إذا تحب تدخّر من شهريتك لازم تبعد على الديون قدر الإمكان وإذا عندك حاجة بش تشريها وتراها غير ضروريّة في الوقت الراهن تنجم تستنى حتى لوقت آخر.

رانية رزيڨ