كيفاه نخفف من التقلبات المزاجيّة أثناء الدورة الشهريّة؟
تتغيّر نفسيّة المرأة أثناء الدورة الشهريّة. وحسب وزارة الصحة والخدمات الإجتماعيّة الأمريكيّة، 75 بالمائة من النساء اللي تجيهم الدورة الشهريّة يعانيو من أعراض مختلفة، منها القلق، تبكي من غير سبب، تتبدّل الشاهية متاعها، تولي تعاني من الإكتئاب ونقص في النوم. فما نساء اخرين تكون الأعراض متاعهم أكثر حدّة اللي هو يصيب بين 3 و8 بالمائة من النساء اللي تجيهم الدورة الشهريّة حسب المركز الوطني لمعلومات التكنولوجيا الحيوّية بأمريكا.
هاذم بعض النصائح اللي تنجموا تبعوهم بش تسيطروا على التغيرات والتقلبات المزاجيّة في فترة الحيض.
الماكلة الصحيّة
وقت الدورة الشهريّة يتسحق الجسم الطاقة، على هاذكا لازم تكون الماكلة فاها فيتامين c بش يكون بدنك ناشط وتنقصلك الفشلة وشعور الإحباط.
وبش ينقصلك الإنفعال السريع لازم تنظم السكر في بدنك خاطر هو عندو دور كبير في التقلبات النفسيّة اللي تصيرلك.
النوم
نقص النوم في فترة الدورة الشهريّة يقلق المرأة ويخلي جسمها تاعب، على هذاكا لازم على الأقل يكون النوم بين 6 و8 سوايع في الليل بش نفسيتها تكون مش متقلبة.
الإبتعاد عن الكافيين
الكافيين يعطّل نزول الدم أثناء الدورة الشهريّة وهكاكا تولي آلام تحت البطن مضاعفة. وزيد الكافيين يأثر بدرجة مباشرة في الجهاز العصبي واللي يخلي المرأة تنفعل فيسع، على هاذاكا يلزم تنقص المرأة شرب السوائل اللي فيها كافيين في فترة الدورة الشهريّة.
رانية رزيڨ