شنوما العادات السامة اللي تمنعنا من النجاح؟
النجاح يبدى من التغيير, والتغيير يبدى من النفس, هذا كان رأي أغلب المتحدثين التحفيزيين والاشخاص الي حققو نجاحات هامة. لكن شمعناها التغيير؟ وهل فما شكون يمنع في روحو من النجاح؟
صحيح, حسب الخبراء النفسيين فإنو فما عادات سامة عند بعض الاشخاص تمنعهم من النجاح و العادات هاذي غالبا ما يكون الشخص ما عندوش دراية بيهم وبسلبياتهم على شخصيتو.
شوما العادات السامة وكيفاش نتخلصو منهم؟
1) العادات السامة:
العادات السامة هوما العادات الغير صحية, وهنا نحكيو على الصحة النفسية اللي تعتبر عامل هام لدفع أنفسنا نحو النجاح. العادات السامة تبدى بمشاكل نفسية كيما “عدم الشعور بالامان” اللي يخلينا ديما مترددين في اتخاذ أي خطوة للأمام ومتشككين في أي حاجة, “الشكوى الدائمة ” وقت يكون الشخص ديما يتشكى ويخمم في المشاكل اللي تعرضلها وهذا يخلي تفكيرو سلبي ومركز على المشاكل, “الندم” اللي يخلينا خايفين من التغيير ومن خوض تجارب جديدة, “لوم النفس” ينجم ينجر عن فشل تجارب قديمة لكن لوم الذات يزيد يأزم من نفسيتنا ويعرقل نجاحنا.
2) كيفاش نتخلصو من العادات السامة:
الخطوة الاولى في التخلص من العادات السامة هي معرفتها, يلزم كل شخص يعرف عاداتو السيئة ويتصالح معاها باش ينجم يتغلب عليها تنجم تكتب عاداتك اللي تحب تتخلص منها وهذا يعاونك باش تحس بتصالح معاها.
ركز مع ردات فعلك وحاول تتفادى التصرفات والافكار السامة اللي عندك وتعمل عكسها هذا باش يكون صعيب في الفترة الاولى لكن تنجم تعاون روحك بتعلم مهارات لينة جديدة تطور من شخصيتك.
في اللخر تخلص من الأفكار السلبية حول أي مشروع جديد وحاول تحيط روحك بأفكار تحفزك على التقدم.
ولاء حبلي