تعرفشي اللي الحظ السيء هو عقدة نفسية؟
“ما عنديش زهر” الجملة اللي يعلقو عليها أغلب الناس خيبات أمالهم بسبب حاجة خايبة صارتلهم والا حاجة ما مشاتش كيما كانو مخططينلها. الحظ حاجة يؤمنو بيها العباد من قديم الزمان وكانت ترتبط بمسائل روحانية, ورغم التطور التكنولوجي اللي وصلتلو البشرية الا أنو الناس مازالت تأمن بالحظ السيء وماتعرفش أنو عقدة نفسية كشفها العلماء.
مالة شنوة هو الحظ السيء وكيفاش يتكون ؟
1) شنوة هو الحظ السيء:
الحظ السيء هو ظاهرة متأصلة في تاريخ البشرية مرتبطة بالخرافات والمعتقدات, الظاهرة هاذي منتشرة في العالم الكل حتى انو برشا ثقافات تتشارك في العناصر اللي يعتقدو أنها جالبة للحظ السيء كيما القطوس الاكحل, المراية المكسرة, الخرزة الزرقاء…
قام عالم النفس الانجليزي في جامعة هيرتفوردشاير “ريتشارد وايزمان” بتجربة على مجموعة أشخاص يعتبرو أنو حظهم جيد أو سيء. استخلص “وايزمان” أنو الاشخاص المحظوظين يتشاركو في ثلاثة ميزات اللي هوما الهدوء, الاندماج والانفتاح. تخيلو شخص منفتح يندمج بسهولة بين الناس, يحب يتعرف على وجوه جديدة ويتواصل مع الناس من الطبيعي أنو الشخص هذا ديما باش يلقى فرص أكبر في العمل والتعامل مع الناس بسبب شخصيتو على عكس الشخص الانطوائي اللي ما يحبش يختلط مع الناس. يرى “وايزمان” أنو الاشخاص الي حظهم سيء غالبا ما يكونو عصبيين ومتشائمين وهذا اللي يخليهم ديما يعانيو من القلق على عكس الناس المحظوظين اللي يتسمو بالهدوء.
2) التحكم في الحظ:
طوَّر عالم النفس الأميركي “جوليان روتر” نظرية مركز التحكم اللي تفسر قناعة الناس بمصدر الأحداث الباهية والخايبة في حياتهم. بعض الناس يأمنو اللي مركز التحكم في الاحداث خارج عن سيطرتهم, الناس هذوما يؤمنو بقوة الحظ ويربطو أي حدث خايب بحظهم السيء, الناس هذوما عادة ما يكون عندهم سلوكيات خايبة تزيد في ايمانهم بحظهم السيء.
بالنسبة للناس المؤمنين أنو مركز التحكم في الاحداث داخلهم, ما يؤمنوش برشا بالحظ ويعتقدو أنو أفعالهم هي المسؤولة المباشرة على اللي هوما فيه, هوما أشخاص متفائلين ما يستسلموش بسهولة وبالتالي يحققو النجاح بمعدلات أفضل من الاخرين.
استخلص “وايزمان” اللي الحظ ليس إلا قدرتك على اقتناص الفرص، باستخدام صفاتك الشخصية الإيجابية، بالتفاؤل وتوقُّع الأفضل ديما، وبرؤية النصف الممتلئ من الكاس. على خاطر الحظ يخضع لقانون “النبؤة الذاتية” يعني كل ما تتنبأ بحدث باهي باش يصيرلك يصير ونفس الشيء ما التنبأ بالاحداث الخايبة وكل هذا يثبت انو مسألة الحظ هي مجرد وهم وعقدة نفسية.
سارة البلومي