كيفاش عايشين التوانسة في أوكرانيا ؟
في الوقت الي الحرب بين روسيا و أوكرانيا إنطلقت, 1500 تونسي يعيش في أوكرانيا الأغلبية منهم طلبة مازالو يستناو في حل باش يروحو لتونس. ظروف صعيبة يعيشو فيها أكدها الطالب بكلية الطب بأوكرانيا محمد علي الفورتي لشبكة إنجح.
تهديدات بالطرد !
بعد قرار الجامعات في أوكرانيا بالدراسة عن بعد, برشا طلبة قرروا أنهم يروحو لتونس لكن الجامعات هددتهم في حال غادروا وما اجتازوش الإمتحانات سيتم طردهم.
إلغاء الرحلات
في 14 فيفري شركات التأمين قررت أنها تلغي التأمين على الطائرات الي تمر فوق الأجواء الأوكرانية الشي الي أدى لإلغاء برشا رحلات. هذاكا علاش برشا طلبة توانسة طالبوا الدولة التونسية انها تقوم بإجلائهم عبر البر من الحدود الغربية .
دول أجلت مواطنيها
من 12 فيفري انطلقت دول في إجلاء مواطنيهم, كيما النرويج, الهند اليابان, النمسا, اسبانيا, السعودية والإمارات العربية المتحدة . في 14 فيفري أول فوج من الجالية المغربية في أوكرانيا رجع للمغرب من جملة 10 آلاف طالب مغربي يستناو الإجلاء .ودعات الأردن مواطنيها للاحتياط وأعلنت في 20 فيفري أنها تدرس إجلاء مواطنيها عبر البر من الحدود الغربية .
أكثر تفاصيل على وضعية التوانسة في أوكرانيا في الفيديو
بلسم العابد