كيفاش تكون باعث مشروع ناجح؟
المعرفة العلمية والخبرة المهنية, زوز عناصر مهمين برشا باش تبدى في أي مشروع لكن من غير المهارات اللينة باش يكون تقدم المشروع ونجاحو بطيء برشا. المهارات اللينة تنجم تتعلمها في الخدمة والا وقت تطبيق المشروع لكن من الأفضل لكل شخص يفكر باش يبدى مشروع أنو يكون متمكن من بعض المهارات من قبل كيما:
1) الاتصال
الاتصال اللفضي هو أهم مهارة لرواد الاعمال خاصة بالنسبة للأشخاص اللي يخدمو في التسويق باعتبارو يوضح رؤية و تمشي مشروع او حملة معينة. استعمال كلمات دقيقة, مهنية ومختصرة ضروري باش يعزز الفهم والتعاون بين الموضفين في أي مجال ويسهل الخدمة والتعاون بينهم وهذا باش ينعكس ايجابيا على الخدمة والمردودية.
2) حل المشاكل
كل مشروع أثناء انطلاقو يواجه مشاكل وعقبات تنجم تزعزع ثقة الموظفين في امكانية نجاح المشروع و تواجهاتو, لذلك من المهم لكل باعث أعمال أنو تتوفر فيه مهارة حل المشاكل لأنو حل المشكلة يعاوننا في تطوير المشروع وتحسين بيئة العمل غير أنو المشاكل تنجم تكون ناجمة عن أخطاء في التنظيم أو التخطيط. حل المشاكل ينجم يضمن استمرارية المشروع وصمودو قدام عقبات وتغيرات السوق.
3) التفاوض
القدرة على التفاوض بفاعلية هي حاجة ضرورية لإنجاح مشروعك, واذا كان فشلت باش تتعلم كيفاش تتفاوض أثناء بداية اطلاقك للمشروع, هذا يعني انك باش تبقى ديما في المرتبة الثانية وتخلي خدمتك محدودة. مهارة التفاوض تعطي قيمة أكبر لخدمتك وتخوض مشاريع كبيرة كيما تعاونك باش تعرف أولوياتك وباش تقنع الاخرين بوجهات نظرك.
4) ادارة الوقت
من اكثر المشاكل اللي تواجه رواد الاعمال هي عدم القدرة على تحضير الخدمة في الوقت المطلوب , أما وقت تخدم على ادارة و تنظيم وقتك تضمن تقديم أحسن خدمة لحرفائك وتحترم المواعيد, على خاطر يكون عندك أكثر وقت للعمل على جودة المنتوج وهذا يحسن من سمعتك في السوق ويخليك تخدم بأريحية اكثر كيما يعاونك باش تنظم مهام فريق العمل متاعك.
المهارات اللينة اليوم أصبحت حاجة أساسية باش تطلق مشروع والا باش تتحصل على فرص عمل أكثر لذلك العمل على تحسين المهارات يضمن نجاحك سواء كباعث مشروع او كعامل.
سارة البلومي