كيفاش تقول لا من غير ما تحس بالذنب
وافقت مرة باش تعمل حاجة ما تحبهاش؟ وإلا باش تقبل خدمة على مشروع ماتحبش تخدم فيه؟ وإلا حتى خرجت مع شخص لبلاصة ماتحبش تمشيلها بسبب أنك ما تعرفش تقول “لا”وإلا على خاطر تحس بالذنب وقت تقول “لا”.
الرفض بأدب موش ساهل, خاصة إذا كنت تتعامل مع طلب شخص عزيز عليك وإلا شخص عندو عليك سلطة. لكن من الممكن لأي شخص انو يتعلم كيفاش يقول لا من غير ما يحس بالذنب.
هذوما طرق ينجمو يعاونوك باش تتعلم كيفاش تقول “لا” من غير ما تحس بالذنب:
1) خوذ وقتك في التفكير
في عوض ما تقول “أي” على كل حاجة تتطلب منك, قول ” توا نفكر في الموضوع’ وإلا ” توا نجاوبك بعد 24 ساعة” على خاطر الرفض بأدب بعد الطلب بنهار أسهل من الرفض مباشرة.
حتى بعض الثواني من التفكير ينجمو يعطيوك الفرصة باش تلقى الجواب المناسب للموقف اللي انت فيه.
2) جاوب في e-mail
إذا كان قول كلمة “لا” على خدمة معينة صعيب في المباشر, تنجم تجاوب ب e-mail لأنو كتابة الاجابة أسهل ببرشا من قولها.
3) جد طريقة مغايرة لقول “لا”
عود نفسك على أنك تقول “لا” للطلبات البسيطة. هذا يخليك تعرف الحاجات اللي يلزمك توافق عليها والحاجات اللي يلزمك ترفضها. وحاول تكتب مع كلمة “لا” تبرير بسيط بطريقة مؤدبة, مثلا ” نقدر العرض متاعك لكن ما نظنش أنو يناسبني”. هكا إحساسك بالراحة باش يتطور مع الوقت.
4) تفكر اللي الرفض ما يأثرش على علاقتك بالشخص
خلي ردودك خفيفة وما تربطش الرفض بعلاقتك مع صاحب الطلب. ديما تفكر اللي الرفض متاعك موش باش يجرح مشاعر الناس.
5) ما تترددش في طلب المساعدة في الخدمة
إذا كنت مضغوط بالخدمة و يطلب منك مديرك خدمة أخرى, قلو اللي أنت عندك برشا خدمة وأسألوا على إمكانية إعطاء الخدمة لواحد من زملائك.
6) أعطي حل وسط
عوضا عن الموافقة أو الرفض المباشر, حاول تلقى حل وسط تنجم تقول بيه “لا” وتعاون بيه الشخص اللي طلب منك الحاجة. مثلا إذا طلب شخص باش يبقى مدة طويلة بحذاك في الدار, أسألو إذا كان تنجم تعاونو باش يلقى مكان أفضل يبقى فيه.
كلمة “لا” موش ساهلة, لكنها أحيانا تعطينا إحترام أكثر من كلمة “نعم” وتخلينا واثقين من أنفسنا وتنقص علينا الضغوط والتفكير الزائد.
سارة البلومي