عوّد روحك على قراءة الكتب
فما ناس مغرومين بقراءة الكتب كهواية وفما اللي يحبو يقراو بسبب تعطشهم للعلم والمعلومات, أما فئة أخرى اللي ما جربوش قراءة الكتب والا اللي يقولو ” ماعنديش وقت للقراءة” , “نتمنى كان جيت نحب القراءة”… صحيح القراءة هواية وغرام لكنها عادة ننجمو نكتسبوها ونغرمو رواحنا بيها.
هذوما نصائح من “عشاق الكتب” اللي كانو ضيوف انجح, ينجمو يعاونوك تتغرم بالمطالعة:
1) خصص وقت:
“ما عنديش وقت” أكثر عذر تسمعو من الناس اللي ما يقراوش, لكن كل واحد عندو وقت للحاجة اللي يحبها, يعني الحكاية الكل مربوطة بالعقل, اذا خصصت نص ساعة يوميا للقراءة والتزمت بيها كموعد رسمي فإنك باش تلقى روحك ديما عندك وقت للقراءة حتى ولو قصير. كيما تنجم تشترك في وحدة من المكاتب العمومية وهذا يخليك ملتزم أكثر بالقراءة.
2) اختار الطريقة اللي تحب تقرى بيها:
قراءة الكتب معادش مقتصرة على الكتب الورقية, ينجم أي شخص ما يستمتعش بقراءة الكتب الورقية لكنو يحب يقرى الكتب الالكترونية, والا يعدي أغلب وقتو في الكرهبة فيحب يقرى كتب مسموعة. لذلك من المهم أنك تحدد الطريقة اللي تحب تقرى بيها الكتب.
3) أعمل قائمة:
أعمل قائمة بالكتب اللي تحب تقراها وخاصة الكتاب التالي. برشا ناس يحددو ميزانية سنوية للكتب يشريو فيها عدد معين من الكتب باش يقراوه على مدى عام كامل. هذا يعاونهم باش يلتزمو أكثر بالقراءة, يكونو متحمسين للكتاب القادم ويحسو بالتحفيز بعد ما يشوفو كمية الكتب اللي قراوها.
4) ديما خلي معاك كتاب:
ديما خلي كتاب في ساكك, في كرهبتك والا حتى في تليفونك على خاطر ماتعرفش اي وقت ينجم يكون مناسب للقراءة. تنجم تتعطل في قاعة انتظار أو وسيلة نقل أو تسافر لمسافة بعيدة فتكون القراءة هي وسيلة الترفيه متاعك.
5) شارك تجربتك مع أشخاص اخرين :
شارك الكتب والمعلومات اللي تقراهم مع الناس الأخرين, المشاركة تخليك تحس بالاستفادة اللي خذيتها من الكتاب وتخليك تشوف جوانب أخرى من الكتاب كيما تخلق نوع من المنافسة بينك وبين شريكك في القراءة. اذا تحب تشارك الكتب اللي تقراهم مع تنجم تدخل على صفحة “Hamza Bookclub” وين تلقى مجموعة كتب ونصائح تنجم تعاونك باش تستمتع بالقراءة.
سارة البلومي