عالم صور متحركة داخل تاكسي تونسي
أمين القرامي، سائق تاكسي في عمر 45 سنة، إختار إنو يكون سائق إستثنائي و يخلق روح جديدة بكلها براءة و فرحة في التاكسي متاعو الي سماها “عالم الكرتون” و زينها بمجسمات كرتونية لصور متحركة تربينا معاها و حبيناها .
1_تاكسي”عالم الكرتون”:
أمين كان يمشي للفريب و يختار المجسمات الكرتونية حسب الشخصيات الي كبرو معاهم الأجيال الي فاتو ،و توا تقريبا 6 شهور ملي بدا يدور بعالم صور متحركة داخل التاكسي متاعو و نجح بش يدخل الفرحة في قلوب العباد .
اليوم إنجح عملت دورة مع سائق التاكسي أمين القرامي الي حكى على أسرار “عالم الكرتون” الإستثنائي و ردة فعل العباد الي تطلع معاه.
2_تاكسي مصدر للسعادة:
“السعادة عمرها ما كانت فلوس..” هكا بدا “أمين” كلامو و هو يحكي على الطاقة الإيجابية الي يستمدها من التاكسي متاعو بش ينجم يعيش و يعيش عايلتو فرحانين.
هي مجرد فكرة بسيطة لكن في داخلها برشا رسائل مزيانة حب أمين يوصلها لكل شخص يركب معاه في التاكسي . و كيما عبر هو “فرح العباد بش العباد تفرحك” . الشخصيات الكرتونية الي في التاكسي ترجع بيك للطفولة و عالم زمردة و كوكب الغموض و يحير فيك حنين للماضي و برشا مشاعر لدرجة التأثر و البكاء .
3_تاكسي “عالم الكرتون” جزء من حلم كبير:
بالنسبة لأمين القرامي ، تاكسي “عالم الكرتون” هي مش مجرد وسيلة عمل كهو، هي عالم خلقو بش يعيش فيه و يشارك بيه غيرو، هي وسيلة يطمح من خلالها إنو يخقق منها حلمة كبيرة و هي إنو يغير عقلية الأجانب الي يجيو لتونس و هوما ماخذين فكرة خايبة على التاكسيات التوانسة ، و يحببهم في بلادنا و يوريهم الي مزال فيها برشا خير و حاجات مزيانة…
بش تعرفو أكثر تفاصيل على العالم الي صنعو سائق التاكسي “أمين القرامي” تفرجو في الفيديو على صفحة انجح
ولاء الحبلي