رغم كل شيء ,هو ملك الكوميديا
موجة من الانتقادات طالت الممثل الكوميدي لمين النهدي بعد عرض مسرحية “نموت عليك” خلال مهرجان قرطاج. أغلب الحضور غادرو قبل نهاية العرض ودارت على مواقع التواصل الاجتماعي برشا تعليقات سلبية, مما تسبب في إلغاء باقي عروضو المبرمجة.
لمين النهدي أو امبراطور الضحك كيما سماه الجمهور لسنين, صاحب مسيرة تفوت ال40 سنة, قدم خلالها أنجح الأعمال المسرحية, السينيمائية والتلفزية الكوميدية. لكن يبدو أنو المسيرة هاذي غابت على المنتقدين.
1- المسرحيات
لمين النهدي في رصيدو 54 مسرحية و13000 عرض, خاض عدة تجارب مسرحية في المسرح الشعبي المسرح الفرجوي وكان من بين أول المسرحيين اللي قدمو one-man-show ونجحو فيه.
أنجح المسرحيات اللي قدمهم” المكي وزكية” اللي سجلت رقم قياسي في عدد العروض ب650 عرض, ومسرحية “في هاك السردوك نريشو” اللي بقات تتعرض بين 2002 و 2012 وتمنعت من العرض مدة عام ونص.
أسس لمين النهدي للمسرح النقدي ودخل للحبس في عهد بورقيبة بسبب النقد السياسي اللي وظفو في مسرحياتو .
2- الأفلام
في رصيد لمين النهدي 12 أفلام أبرزها فيلم فردة ولقات أختها اللي مثل نقلة نوعية للكوميديا في تونس. هو أول فيلم كوميدي يشارك في بطولتو لمين النهدي ويتعرف بيه عند الجمهور التونسي, خرج في قاعات السينماء سنة 1974 ومن وقتها أصبح من أبرز رموز الضحك في تونس.
3- المسلسلات
شارك في أكثر من 10 مسلسلات أغلبها سلسلات كوميدية كيما سي الزهواني ,عجبكش, اللي ليك ليك.
كان أول من دخل النقد السياسي للتلفزة بسلسلة أولاد الحلال وشفناه في أشهر مسلسلات الزمن الجميل كيما الخطاب عالباب وحكايات العروي. ورغم نجاح أدوارو التلفزية اختار انو ظهورو يكون محدود في التلفزة وركز أكثر على المسرح.
باش تعرفو أكثر تفاصيل على مسيرة لمين النهدي,تفرجو في الفيديو.
سارة البلومي