علاش إخترت كتاب “الأخيار” لياسمينة خضراء ؟
“ياسمينة خضراء” والا “محمد مسهول” عدا 36 سنة من حياتو في الجيش الجزائري منهم 25 سنة في الحرب, شاف وعاش ويلات العشرية السوداء.
وهو ضابط في الجيش باش يستعمل إسم مستعار باش يهرب من الصنصرة و المنع وعمرو ما كان يتصور أنو الاسم اللي إستوحاه من إسم مرتو باش يولي إسم شهرتو ويولي بيه واحد من أشهر الكتاب العرب على قيد الحياة في العالم.
كتبتو ترجمت لأكثر من 50 لغة وشهرتو في المكسيك والإ اليابان سبقت شهرتو في فرنسا و الا في الدوّل العربية.
الدول العربية اللي محنتها الكتاب … دول وشعوب ماتقراش . أحد أشهر مؤلفات كاتب البوك كلوب للشهر هذا هو “Les Hirondelles de Kaboul “تباعت الترجمة متاعو في سنغافورة أكثر من الترجمة العربية في كل الدول العربية.
رغم انو يهوى العربية ويعتبرها أفضل لغة للشعر في العالم… شهرتو كانت بمألفاتو بالفرنسية اللي يعتبرها لغة الرواية بإمتياز. مسيرتو درس لكل واحد فينا وأثبت أنو لا وجود للمستحيل ، هو اللي كان مستواه ضحل في الفرنسيةولى من سنوات واحد من أكثر الكتاب اللي تتقرا الكتب متاعو في لغة موليار.
هو اللي رغم حملات التشويه اللي لاحقتوا من اللي إكتشفتوا أنو عسكري سابق يقول “ماني عدو حتى حد … أنا نمنع على روحي انو يكون عندي أعداء ، كيف تعيش في الكره راك تضيع حياتك وتخسرها في محاولة إيذاء الاخر”. ويزيد “ما تضيعش وقتك في الكره وما تخلي حد يوقفك … عدوك الوحيد اللي يخليك ما توصلش وين تحب هو انت”.
كتابو الاخير اللي هو كتاب “Les vertueux” لقا إستحسان كبير ياسر عند عدد هام من النقاد وخاصة عند الجمهور الواسع متاعو وهو يقول انو أفضل ما كتب في حياتو … الكتاب اللي يجي في 541 صفحة يحكي فيه على واحد من المواضيع اللي شاغلتوا بإستمرار ، القيم اللي تحكم فينا ، القيم اللي نعيشوا بيها من خلال قصة ياسين ومغامراتو في الحرب العالمية الأولى إنطلاقا من الجزائر وهو الكتاب اللي اخترتهولكم في البوك كلوب للشهر هذا.
