هكا تأثر علينا الألوان
كل واحد منا عندو لون مفضل يحب يعتمدو في ملابسو والا يحب يراه في غرفتو على خاطر اللون هذاكة يرتحو نفسيا والا يحفز فيه مشاعر معينة.وهذا اللي أثبتتو الأبحاث و الدراسات اللي برهنت تأثير الألوان على أدمغتنا ونفسيتنا وقدرتنا على التركيز.
كيفاش تعالج أدمغتنا الألوان؟
علماء الأعصاب في كلية الطب بجامعة هارفرد استخدموا التصوير بالرنين المغناطيسي لتحديد منطقة استقبال الألوان في دماغ البشر واكتشفو أنو المنطقة هاذي تتغير من شخص لآخر وهذا أثبت انو تأثير الألوان يختلف حسب الأشخاص.
في عام 2002 اكتشف الباحثين أنو عند استخدام الألوان في الامتحانات ، فإنو النتيجة تكون أحسن بنسبة من 5% إلى 10% عن استخدام الأبيض والأسود فقط. وهذا دليل على تحفيز الألوان لذاكرتنا وارتباطها بأماكن ومعلومات معينة في الدماغ.
كيفاش تأثر الألوان على أدمغتنا؟
- اللون الأزرق يحفز الابداع في الدماغ ويعاوننا على تهدءة أعصابنا لكن الاكثار منو ينجم يخلينا نحسو بالاكتئاب خاصة اذا كان اللون ذو درجة غامقة.
- اللون الأحمر يحفز الغدد الكظرية، وينجم يولد مشاعر التهديد، أو الطاقة المفرطة ، حسب شدة التحفيز اللي يسببو للدماغ. ومع ذلك فإنه يحسن الأداء والتركيز خاصة في الحاجات المتعلقة بالمهمات اللي يلزم ننجزوها.
- اللون الأصفر يخلينا نحسو بالسعادة والتميز بسبب ارتباطو بمعدن الذهب,لكن الافراط منو ينجم يخلينا نحسو بعدم الارتياح والضغط, الدليل أننا ديما نستعملوه في الرسائل التحذيرية.
- اللون الأخضر يعاوننا على الاسترخاء ويساهم في تحسين الصحة النفسية كيما يساعدنا في التخلص من الضغط النفسي بسبب الطاقة الايجابية اللي يحملها اللون.
- البرتقالي يحفز التفكير النقدي ويعزز الذاكرة لذلك كيما يحفزنا على انهاء مهامنا على خاطرو يحسسنا يأهمية الحاجات الي باش نعملوها, لذلك نلقاوه الخيار الأول لتمييز المعلومات المهمة في كراساتنا وكتبنا .لكن البرتقالي الفاقع ينجم يسبب تحفيز مفرط للدماغ ويسببلنا الحركية الزايدة.
وانت كيفاش يأثرو عليك الألوان و شنوة لونك المفضل؟