معاني أسماء ال24 ولاية تونسية !
24 ولاية في بلادنا ولكل ولاية إسم و أصل يميزها فهل تعرف شنوة أصل كل تسمية و معناها ؟
“تونس”
حسب العديد من المؤرخين معنى إسم “تونس” يعود للألهة إللي كان يأمنو بيها المتساكنين في المدينة في العهد الفينيقي وهي الألهة “تانيت” .
أما في اللغة الأمازيغية فإسم “تونس” يعني المخيم الليلي أو مكان للتوقف وقضاء الليل فيه.
1 ولاية بن عروس
هي نسبة للولي الصالح أحمد بن عروس و هو ولي صالح و رجل دين واليوم هو مدفون في زاوية سيدي أحمد بن عروس في نهج سيدي بن عروس.
2ولاية نابل
كانت تتسمى في الماضي “نيابوليس” يعني المدينة الجديدة وهو إسم من أصول إغريقية.
3 ولاية باجة
كانت تتسمى “vaga” من قبل الرومان و هو مصطلح يرمز للبقرة الحلوب أو تموجات سنابل القمح و مع الفتح الإسلامي تطلق عليها إسم “باجة” والعرب كانوا يسميو باجةبـ “باجة القمح” للدلالة على خيرات المنتوج من القمح بالمدينة.
4 ولاية أريانة
إسم إيراني و يعني بلاد الإيرانيين يتفق أغلب المؤرخين أنو أريانة هي عربية النشأة إسم “أريانة” هو إسم قبيلة عربية كانت تعيش في اليمن سكانها ملقبين لليوم بالأريانيين جات القبيلة هذي لإفريقية إللي هي تونس اليوم في آخرعهد الولاة يعني قبل نشأة الدولة الأغلبيّة.
6 ولاية بنزرت
هو إسم يوناني و يعني الحصان الذهبي أو الحصان الأشقر تتسمى زادة ب”بنزرت الفينيقية “أو “هيبو أكرا” أسسوها الفنيقيين الجايين من صيدا بـلبنان.
7 ولاية صفاقس
تعددت الروايات على معنى إسم ولاية صفاقس يقولو العديد من المؤرخين أنها نسبة لقائد أمازيغي قديم إسمو “سيفاكس” و الرواية الثانية تقول أنو إسم ولاية صفاقس“يرجع لأسطورة “صفا” و “قص” تقول الأسطورة أنو ملكة استقرت في صفاقس فقررت أنها تأسس مدينة بإعتماد جلد الثور فأمرت واحد من عبيدها و إسمو “صفا باش يقص جلد الثورو قاتلو يا “صفا” “قص” جلد الثور ومن هنا تسمات المدينة بصفاقس.
لكن الرواية هذي ما فماش شكون يأيدها هذاكا علاش نلقاو برشا من المؤرخين مشاو للمعنى الأقرب أنو يكون صحيح هو أنو “صفاقس” كلمة أمازيغية تعني اللباس إللي تلبسو المرأة في خصرها لتحصينها و بهكا فإنو معنى إسم ولاية “صفاقس هوالمدينة المحصنة.
8 ولاية تطاوين
هو إسم أمازيغي و يعني المنابع أو العيون الجارية بالماء.
9 ولاية توزر
يقولو أنو التسمية ترجع لإمرأة خزافة إسمها “توزر” بعد ما طردوها سكان قريتها السابقة بسبب أنهم تقلقو من الدخان الخارج من بيتها كل يوم بسبب خدمتها في الزخف فإنتقلت المرأة هذي وإستقرت في توزر و فما زادة تفسير آخر لإسم توزر على إنو من اللغة الأمازيغية و تعني المرتفع أو الهضبة.
10 ولاية منوبة
إسم من أصل بونيقي كلمة منوبة تتركب من مفردتين الأولى ” منّه” وتعني السوق والثانية “وبة” وتعني الخيريعني “منوبة” هي كلمة تعني سوق الخير.
11 ولاية جندوبة
هو إسم بربري يتكون من مفردتين الأولى “جن” ومعناها سوق والثانية “دوبة” ومعناها “القمح” فـإسم جندوبة يعني سوق القمح.
12 ولاية زغوان
أصل الإسم لاتيني “زيكا” أو “أكوا” و تعني “ماء”و بالنظر لثرواتها المائية فلكلنا نعرفو أنو زغوان تشتهر بمنابع الماء والحمامات الطبيعية.
13 ولاية سليانة
إسم مقتطف من “سليان” وهو مصطلح أمازيغي يعني “العالي” بمعنى المرتفع أو الهضبة و ولاية سليانة معروفة بجبالها العالية.
14 ولاية سوسة
“المحروسة” هو الإسم إللي كانو يستعملوه المسلمين هو من أصل أمازيغي وين كانو ف ما برشا بلايص في شمال إفريقيا عندها نفس الإسم مثال مدينة “سوس” في المغرب و “سوسة” في ليبيا.
15 ولاية المهدية
إسم منسوب للخليفة الفاطمي “عبد الله المهدي الفاطمي”.
16 ولاية سيدي بوزيد
إسم منسوب للولي الصالح “سيدي بوزيد”.
17 ولاية ڨابس
من قبل كان يتطلق عليها “تكابي”وفما شكون يقول من المؤرخين أنها إستمدت إسمها من قديس روماني إسمو “تكابيس”.
18 ولاية ڨـبلي
أصل التسمية لاتيني “كابيلا” ومعناه المصلي في الكنيسة.
19 ولاية القصرين
ترجع تسمية الولاية من عهد الرومان.
20 ولاية قفصة
هو إسم لاتيني وإشتقاق عربي للتسمية اللاتينية “كاباسا”وهو مصطلح يعني الحضارة الحجرية القديمة.
21 ولاية القيروان
هو إسم فارسي “كيروان” ويعني المعسكر أو المكان إللي يدخرو فيه السلاح.
22 ولاية الكاف
كان يطلق عليها قديما “سيكا فينيريا” نسبة ل”فينوس” آلهة الحب والجمال.
23 ولاية مدنين
هي إختصار لكلمة “مدنيين” جمع “مدني” أي مجموعة سكانية.
24 ولاية المنستير
تعني دار العبادة وتطلق عليها الإسم هذا نظرا لكثرة المعابد إللي إنتشرت فيها في العهد الفينيقي.
و إنت هل كنت تعرف معاني أسماء الولايات ؟
ولاء الحبلي