الهريسة التونسية في قائمة التراث العالمي لليونيسكو
هريستنا التونسية اللي ما تغيبش على حتى دار من الشمال للجنوب, حتى انو البعض يعتبرها جزء من الهوية التونسية ويسميونا شعب الهريسة, أدرجتها منظمة اليونيسكو ضمن قائمة التراث العالمي الغير مادي.
1) الهريسة واليونيسكو:
منظمة اليونيسكو نشرت وثيقة لتعريف الهريسة كتبت فيها اللي الهريسة هي عنصر هوية لتراث الطهي الوطني وعامل من عوامل التماسك الاجتماعي وعنصر موحد لبلاد كاملة وضمتها لقائمة “المعارف والمهارات والممارسات المطبخية والاجتماعية”. الهريسة فيها أكثر من نوع وكل جهة في تونس تعملها بطريقة مختلفة, ورغم انو الوطن القبلي أكثر بلاصة مشهورة بالهريسة الا أنو كامل الجمهورية تنتجها و تستعملها في الماكلة.
2) أصل الهريسة:
أصل كلمة هريسة جاي من فعل “هرس”, في شهر أوت تسمع صوت المهراس في برشا ديار في تونس, بعد تشييح الفلفل وغسلو وتنقيتو من الزريعة يتهرس بالمهراس النحاس برشا مرات حتى يتعجن وبعد يتزادلو الثوم والملح للنكهة. كل ولاية في تونس عندها هريستها وطريقتها الخاصة في صنعها لكن في الاخير المنتوج واحد يوحد التوانسة الكل كبار وصغار وما يغيبش على حتى دار. الفلفل الاحمر يتزرع في الغالب في مناطق الشمال والوسط وخاصة في الوطن القبلي اللي تشهر بتصدير الهريسةوهو مصدر رزق لبرشا فلاحة وبرشا نساء يصنعو مشتقات الفلفل كيما الهريسة, الفلفل الشايح والهروس وغيرو.
3) فوائد الهريسة:
حسب خبراء التغذية فإنو الفلفل الاحمر والهريسة عندهم برشا فوائد على خاطر فيهم برشا ماء وفيتامينات وتعالج الالتهابات والزكام في الشتاء كيما تعزز الدورة الدموية وتعدل مستوى السكر في البدن.
الهريسة التونسية اليوم تدور العالم, نلقاوها تتباع في حكك في برشا دول في العالم ويضيفوها المطاعم في قائمات المقبلات, أخرهم مطعم “ماك دونالدز” العالمي كتكريم للمغني التونسي “غالي”.
سارة البلومي