مخترعين توانسة
كرهبة تخدم بالطاقة الشمسية, غواصة مائية, جبيرة ثلاثية الابعاد وآلة تحول الهواء لماء, هاذي كلها اختراعات تونسية 100% تحققت على يدين كفاءات شابة كانو ضيوف حمزة البلومي في برنامج “انجح في حياتك” الموسم الخامس.
شكونهم المخترعين التوانسة؟
1) بوبكر سيالة
مخترع Bako Motors, كرهبة تنجم تمشي بين 50كم و70كم بالطاقة الشمسية و100 كم ببطاريات الليتيوم. الكرهبة بثلاثة عجالي وفيها تقنية الشحن الذاتي بالطاقة الشمسية كيما تنجم تخدم بالطاقة الكهربائية و مخصصة للخدمات كيما خدمات التوصيل و الفلاحة. بوبكر تنقل لألمانيا بعد الباكالوريا وين واصل تعليمو في الالكترونيك, خدم في شركة BMW في ألمانيا ومن غادي جاتو الفكرة باش يصنع سيارة تونسية صديقة للبيئة وبسعر معقول.
2)رامي الكلبوسي
مخترع الروبوت البحري Seabot, غواصة مختصة في تجميع المعطيات وتعاون في القيام بالبحوث العلمية, الغواصة تخدم على عمق في حدود 300م تحت سطح البحر وتم تصديرها لبريطانيا. اختراع Seabot بدى بغرام رامي بالروبوتيك اللي بدى من عمر صغير واهتمامو بتكنولوجيا الغواصات, أسس نوادي للروبوتيك وشارك في مسابقات في تونس وأمريكيا وين واصل قرايتو ودرس الروبوتيك للكبار والصغار. في 2021 رجع لتونس وأسس الشركة الناشئة متاعو المختصة في الروبوتات البحرية.
3) ايهاب التريكي
التونسي اللي حول ندوة الصباح لماء “بآلة كومولوس”, الآلة تخدم بالطاقة الشمسية وممكن التحكم فيها بالتليفون وتنتج بين ال20 و 30ل ماء يوميا من خلال تكرير ندوة الصباح. الاختراع هذا ينجم يحل مشكلة شح الموارد لمائية في تونس وفي العالم. ايهاب قرى هندسة في فرنسا وأمريكيا من بعد رجع لتونس وين خدم مستشار لوزير الطاقة “كمال بن ناصر” وتم اختتيارو من بين 100 من أبرز القادة الشباب في افريقيا.
4) هيثم الزواوي
هيثم اخترع أول جبيرة ثلاثية الابعاد وأول جسم اصطناعي لتعويض العظام المريضة في تونس وشمال اافريقيا. الجسم يتصنع بطريقة الطباعة ثلاثية الابعاد اللي تصنع جسم اصطناعي من “مادة التيتانيوم” خاص حسب حالة المريض. اختراع الجبيرة بدى بصدفة, أول جبيرة صنعها هيثم كانت لصاحبو اللي تقلق من الجبيرة الجبس, فكانت الفكرة باش يصنعو جبيرة حسب الأبعاد متع يدو. بعد نجاح التجربة انطلق هيثم في صنع الجبيرة ثلاثية الابعاد اللي تعطي نفس نتيجة الجبيرة العادية لكن أرتح. هيثم من مؤسسي الشركة الناشئة Z-health care المختصة في صناعة الاجسام الاصطناعية الطبية وأثبت نجاحو في المجال الشبه طبي رغم أنو متخرج من المدرسة العليا للمهندسين.
باش تعرفو أكثر تفاصيل على إختراعات التوانسة, تفرجو في الفيديو.
سارة البلومي