عادات تخلي أسنانك ما تسوسش قبل وقتها !
تسوس الأسنان هي من الأمراض الأكثر شيوعا في العالم.
باش تتجنب تسوس سنيك قبل وقتهم و إلا تسوسهم في عمر صغير لازم تتخلى على عادات تعملها كل يوم .
هذوما أكثر الحاجات إللي تعملهم يضرو سنيك :
- استهلاك برشا سكر
ما دامك ماكش تتبع في حمية معينة ماكش باش تنجم تبعد على السكر خاصة في مجتمعنا اليوم. السكر تقريبا موجود في كل منتج تاكلو، وخصوصا الحلويات والمشروبات الخفيفة.
السكر يقلق بشكل خاص الصحة الفموية بما أنو يغذي النمو البكتيري والبكتيريا تنتج أحماض تهاجم ميناء الأسنان و السطح الخارجي لسنيك. ومن غادي تبدى يبدى عملية تسوس وتحطيم الأسنان.
تقليل السكر من أكثر الحاجات الصحية ليك و كان ما نجمتش تقلل من نسبة السكريات في ماكلتك حاول ديما بعد كل ما تاكل تنظف سنيك .
- تخلي فمك جاف و شايح
تجنب تجفيف الفم .اللعاب ينظف فمك باستمرار ويزود سنيك بالمعادن.من غيرو تكون للبكتيريا فرصة كبيرة باش تهاجم سنيك ولثتك.
لهنا الماء هو أفضل خيار باش ترطب فمك. لذا أشرب ديما الماء خاطرو يغسلك سنيك ويحسن بشرتك وصحتك عموما.
- الأطعمة النشوية و الحمضية
الخبز ينجم يكون خايب لسنيك. النشا في الخبز يتكسر في فمك ويبدى في تكوين السكر. يتحول الخبز لمعجون لاصق ويملى الشقوق بين سنيك و اللصق هذا إذا ما تمتش إزالتو بالوقت يشجع على التسوس.
أنك تتذوق الحمضيات كيما القارص والبرتقال من الأحماض العضوية الحموضة هذي الكل تعمل هذه لمهاجمة سنيك .
تجنب الأطعمة هذي كل ما تنجم وإذا ما نجمتش أغسلو سنيكم واستعملوا غسيل الفم المطهر بعد ما تاكلو.
- الماكلة في اخر الليل
برشا منكم يقومو نص الليل و ياكلو و العادة هذي خايبة لسنيكم كيما تساهم في زيادة الوزن و غيرو من الأمراض على المدى الطويل. حاولوا تاكلو وجبة كاملة في العشاء. إذا ما نجمتوش توقفو العادة هذي زيدو الخيط وغسول الفم للروتين الليلي متاعكم.
- المشروبات الغازية
المشروبات الغازية تشجع على تشكيل الحموضة . إذا كنت معتاد أنك تشرب صودا نهار كامل فتجنبو العادة هذي لأسنان صحية أكثر.
أشرب دبوزة وحدة من الأول و بالشوية بالشوية بدنك يبدى يتأقلم .
- مضغ ماكلة يابسة
أنك مضغ ماكلة يابسة كيما الثلج و إلا الحلوى اليابسة فيه خطر أنو سنيك تتكسر.
- مضغ حاجات ماهيش ماكلة
المواد الموش الغذائية تؤذي سنيك كان مضغتها كيما الأقلام و الشكاكل و الألعاب و غيرهم .
لذا أعرف شنوة تحط بين سنيك.
- عدم تنظيف الاسنان
كانك ماكش مواظب على تنظيف سنيك هذا يدمرهم. و تزيد في نسبة إصابتك بأمراض اللثة والتهابها. أطباء القلب اكتشفو أنو يضر حتى قلبك.
لازم تنظف سنيك بالشوية على الأقل مرتين في النهار.
أحسن زوز أوقات تحك فيهم سنيك هوما الصباح أول ما تقوم و في الليل قبل ما ترقد.
- ما تمشيش لطبيب أسنان
عدم الذهاب لطبيب الأسنان هو واحد من أخيب الحاجات إللي تنجم تعملها لسنيك.
هذاكا اعلاه احرص على الحصول على مواعيد منتظمة مع طبيب الأسنان باش تحافظ على ضحكتك وعلى أسنان سليمة.
العادات الصغيرة هذي برشا منكم يعملو فيها كل يوم تقريبا و ما تعرفوش أنو التأثير متاعها يدمر فمك و خاصة سنيك فلازم تاخذو احتياطاتكم الكاملة باش تحافظو على سنيكم.
ولاء الحبلي