من الورشة لفن الشارع
اسكندر التاج, فنان تشكيلي تونسي اختار يخرج من الورشة متاعو باش يزين شوارع تونس بالرسم ونجح في رسم أشهر لوحات فن الشارع. أول مرة رسم اسكندر في الشارع كانت في 2019 خلال حملة “حالة وعي” اللي خرجو فيها التوانسة باش يزينو وينظفو شوارع البلاد, ومن وقتها تحولت رحلة اسكندر مع فن الشارع من مجرد مشاركة في حملة الى مشروع ينشر الفن في قرى تونس الكل.
اسكندر كان ضيف “إنجح” حكالنا على المعايير الصحيحة لفن الشارع و مشرورع 24 قرية 24 ولاية.
1) معايير الرسمة الناجحة:
من بين الأسباب اللي خلات اسكندر يخرج من الورشة متاعو ويرسم في الشارع هو التخريب اللي صار خلال حملة “حالة وعي” من قبل الغير مختصين, خاصة بخلط الألوان وتعدد العناصر في نفس الصورة. هنا فسرلنا اسكندر المعايير اللي تنظم الرسم في الشارع و تخلي الصورة ناجحة.
- دراسة المكان
أهم حاجة في فن الشارع هي دراسة خصوصية المنطقة اللي باش ترسم فيها الصورة, باش تكون الصورة متماشية مع نمط عيش سكان المنطقة وما تتضمنش عناصر ممكن تسيئلهم.
- تحديد مكان الصورة
الحيط اللي باش يكون محمل للصورة لازمو يكون في مدخل الحومة والا في مكان ظاهر للمارة باش يمكن أكثر عدد ممكن من الناس من ملاحظة الصورة والتمتع بيها.
- دراسة الوقت
فنان الشارع لازم يقرى حساب المشاهد اللي باش يرى الصورة. من المهم جذب انتباه المارة ولكن من غير تشويش أفكارهم, لذلك لازم تكون الصورة متناسقة في عناصرها وألوانها.
2) مشروع 24 قرية 24 ولاية:
انطلق اسكندر أواخر 2020 في مشروع 24 قرية 24 ولاية اللي يسعى من خلالو باش ينشر فن الشارع في قرية من كل ولاية. يعرف بالقرية, بمواردها الطبيعية أو بموروثها الثقافي من خلال رسومات تزينلها حيوطها ويركز في رسوماتو على ادراج عناصر طبيعية و وجوه الناس. كيما يستعمل اسكندر الرسم في التوعية بالحيوانات المهددة بالانقراض ويدعو للمحافظة عليها كيما السلاحف البحرية في المنستير.
باش تعرفو أكثر تفاصيل على فن الشارع, تفرجو في الفيديو.
سارة البلومي