كيفاه تربي صغيرك على ريادة الأعمال ؟
فما صفات نتولدو بيهم يسهلولنا النجاح, كيما الانفتاح العقلي, روح المنافسة والقيادة. أما فما مهارات لينة نجمو نطوروهم بالوقت كيما الابداع, الشجاعة, القدرة على التحكم في التوتر والاقناع. لذلك من الممكن تربية الصغار على روح ريادة الاعمال.
هذوما خمسة طرق يعاونونا باش نربيو صغارنا على ريادة الاعمال:
1) تحديد الهدف
علم صغيرك يحدد هدف لكل جهد يعملو على خاطر “الهدف” يمثل مفتاح النجاح في المستقبل. تنجم تقسملو أهداف قريبة المدى وأهداف بعيدة المدى, على خاطر كيف يحققو الاهداف ذو المدى القريب, يحسو بطعم النجاح وهذا يخليهم متحفزين لإنجاز أهداف وتحديات أكبر .
2) التعامل مع المشاكل
عود صغيرك أنو يحل مشاكلو وحدو, خليهم يفكرو في المشكل ويخلقو الحل. هذا ينمي قدرتهم على التعامل مع المشاكل. تنجم تعاونو بأنك تقدملو نصيحة لكن مع تقدملوش حلول جاهزة. خاطر الصغير يستحق باش يعرف نقاط القوة ونقاط الضعف متاعو ويعرف يحدد حجم المشاكل اللي ينجم يواجهها.لذلك عاون صغيرك باش يلقى طريقة للتعامل مع المشاكل.
3) التعامل مع المال
التصرف في الفلوس من أهم الحاجات اللي يلزم يتعلموها الصغار في عمر صغير, خاصة كيفاه يستثمرو ويديرو أموالهم وكيفاه يصرفوها في حاجات هادفة ومربحة. حاول توفر لصغيرك مصروف يسمحلهم باش يتدخرو منو باش تكون عندهم الفرصة للاستثمار.
4) التعامل مع الفشل
علمو أنو أي شخص ينجم يواجه الرفض والفشل وانو المهم هو التغلب على الفشل بالاصرار. المدرسة والمحيط ينجمو يعطيو للصغار أفكار سلبية على الفشل, لذلك من المهم نعلمو صغارنا انو الفشل هو حاجة عادية وحافزة للمحاولة مرة أخرى.
5) العمل الجماعي
رواد الأعمال ما يفكروش في أنفسهم طول الوقت, بالعكس يهتمو للناس اللي حولهم على خاطر بالعمل الجماعي نجمو نقودو أي عمل للنجاح. بصفتك ولي يلزمك تعلم صغيرك روح العمل الجماعي, مثلا بأنهم يعاونو أصدقائهم في دراسة والا في نشاط معين وخليه يلهم أصحابو بأفكار معينة.
في النهاية تذكر أنك المثال الاول اللي يراوه أطفالك ويستلهمو منو أفكارهم وصورتهم عن النجاح, لذلك واجب عليك أنك تتعلم الخطوات هاذي وتطبقهم قبل ماتعلمهم لصغارك.
سارة البلومي