كيفاش تحسن من انتاجيتك في الخدمة ؟
روحت نهار من الخدمة من غير ما تكمل المطلوب منك الكل, والا أجلت شطر خدمة اليوم لغدوة وبالتالي تلقى قائمة الأعمال متاعك تطوال أكثر وتحس أنو الوقت مايكفيش باش تكمل الخدمة الكل في الوقت المطلوب.
هذا يعني أنك تعاني من مشكل في الإنتاجية والا في تقسيم الأعمال متاعك حسب وقتك, المشكل هذا موش مرتبط بنوع الوظيفة متاعك ولا بعدد ساعات العمل.
إذا كنت من الناس اللي يعانيو من المشكل هذا, هذوما بعض النصائح اللي تنجم تعاونك باش تزيد في الإنتاجية.
1) ما تاخوش برشا مهام في نهار واحد
ما تخططش أنك تخدم الخدمة الكل في نفس النهار في محاولة منك باش تربح الوقت والا باش تنقص على روحك الخدمة, خاطر موش باش تنجح في هذا حتى ولو كانت خدمة صغيرة.
التركيز على مهمة وحدة في توقيت معين يخليك تكملها في وقت أسرع.
2) خوذ استراحة
يمكن تخمم انو كيف تخدم أكثر ساعات تكون إنتاجيتك أكثر, لكن كيف تخدم أكثر من طاقتك, خدمتك ما تكونش باهية. أثبتت الدراسات أنو كيف تاخو استراحات قصيرة يساعدك باش تركز أكثر ويحسن أدائك العقلي, لذلك حاول أنك تاخذ استراحات بخمسة دقائق في وسط النهار.
3) قسم خدمتك لمهام صغيرة
ساعات كيف ترى قائمة المهام متاعك تتعب وتتوتر نفسيا بسبب كثرة الخدمة اللي يلزمك تعملها. لكن إذا قسمت خدمتك على مهام صغيرة بالترتيب تنجم تحس بقدرة أكثر على إنهائها في الوقت المناسب وزيادة إنتاجك كيما يخلي المهام الكبيرة تظهر بسيطة.
4) أعطي أولوية للمهام الكبيرة
أغلبنا نأجلو أكبر خدمة عندنا لوقت لاحق على خاطر ماناش واثقين من تمكننا منها. لكن وقت نخليو أكبر المشاريع لأخر النهار ما نجموش نعطيوهم الاهتمام اللازم ونخدموهم بالقدا بسبب التعب.
وهذا اللي يخلينا نأجلو أغلب مشاريعنا للنهار اللي بعدو ويخلي انتاجيتنا ضعيفة. تنجم تقسم المهام الكبيرة حسب أكثر وقت تكون فيه ناشط ومركز.
5) حدد وقت لكل مهمة
حدد وقت لإنجاز كل مهمة وحاول تكملها في الوقت المحدد. تحديد الوقت يخلينا نحسو بمسؤولية أكثر تجاه الخدمة ويعاوننا باش نعرفو كل خدمة قداش يلزمها وقت وبالتالي ننجمو ننظمو جدول أعمالنا حسب قدراتنا الإنتاجية.
في النهاية تبقى الإنتاجية مرتبطة بالطاقة اللي عندنا وكيفاش نوزعوها طيلة نهارنا, لذلك انتاجيتنا تكون مختلفة من يوم لأخر وهذا شيء طبيعي.
سارة البلومي