خذاو الريسك..باش ينجحو في غرامهم
بالطبيعة تنجم تعيش حياة ساهلة و مريحة ماغير ما تاخذ الريسك, لكن وقت اللي تقعد تتجنب مشاعر عدم الارتياح اللي ترافق المجازفة يعني أنك ماكش باش تطور ثقتك بنفسك، وموش باش تبني الحياة اللي تحب عليها, وعلى الرغم من أنو الريسك يخوف لكنو ضروري للنجاح في الحياة. هوما توانسة نجحو في حياتهم لكن خذاو الريسك باش نجمو يتطورو و يوصلو للي يحبو عليه كانو ضيوف إنجح في حياتك مع حمزة البلومي و حكاو على الريسك كيفاش بدللهم حياتهم.
1- هند شاوش
برشا تضحيات قدمتها باش تكون هي اليوم سيدة الرالي الأولى في تونس, بالنسبة لهند ماتنجمش تنجح في حتى شي إلا ما تقدم تضحيات
كل ما تصحح عقد رعاية هند تعرف اللي ماتنجمش تكون حامل خاصة اللي خدمتها تنجم تأثر عليها. و ماتحبش تقص على الراليات باش ما تتنساش لكن هند تحب برشا اللي تعمل فيه هذاكا علاش خذات إختيار صعيب وتخلات على حلمها بالأمومة باش تكمل في غرامها.
2- جهاد الحناشي
جهاد الحناشي من مؤسسي Majesteye بعد ما عدا سنين في الاستشارات في مجال المحاسبة اختار أنو يدخل لعالم البترول الجديد علم البيانات و الا المعطيات اللي ولات مصدر دخل كبير للشركات. بالنسبة لجهاد من مقومات النجاح أنك تعمل حاجة مغروم بيها وديما في الإختيار للوصول للغرام الواحد يلزم يختار الثنية الصعيبة و يغامر باش يتعلم أكثر.
3- عصام الشوالي
عصام اللي يعشق الرياضة بشكل جنوني مالصغرة و رغم انو دراسته كانت الفرنسية إلا انو عمرو ما تصور انو باش يكون معلق رياضي .و من سنوات هو من نجوم التعليق الرياضي في اشهر القنوات الرياضية من ART و الجزيرة الرياضية وصولا للBeinsports. اللي ما ياخذش الريسك في الحياة ما ينجمش ينجح بالنسبة لعصام, لكن الريسك يلزم يكون محسوب على خاطر سلوم النجاح يتطلع درجة درجة.
بلسم العابد