أبدى نهارك بعادات صحية !
الروتين الصباحي لأغلب الناس متشابه, بعد صوت المنبه الصباحي, نتفقدو تليفوناتنا ونشوفو الأخبار الجديدة وحساباتنا على مواقع التواصل الاجتماعي ومن بعد نحضرو رواحنا ونخرجو للخدمة أو للقراية.
الطريقة اللي نبداو بيها نهارنا تأثر على نفسيتنا وانتاجيتنا طوال اليوم, إذا كان الروتين الصباحي متاعك غير صحي تأكد أنك باش تعدي نهار متوتر وموش مرتاح, حسب دراسة أمريكية حول علم نفس الموظفين فإنو في الفترة الأولى لإنتشار وباء كورونا أغلب الموظفين حسو أكثر بالتوتر والتعب النفسي بعد تغيير روتينهم الصباحي.
هذوما بعض الخطوات اللي ينجمو يساعدوك تبدا نهارك بطريقة صحية:
1) قوم بكري
الاستيقاظ الباكر يحسن أداءك العقلي, كيما ينقص من احتمالية الإصابة بالكآبة بنسبة 23% حسب مركز JAMA لعلم النفس. بالاضافة لأنك كل ما استيقظت أبكر كل ما كان عندك أكثر وقت باش تقوم بواجباتك بأريحية. كيما يساعدنا ضوء الصباح على النشاط وتحسين نوعية نومنا في الليل.
2) ما تتفقدش تليفونك
إذا كنت واحد من %80 من الناس اللي يشدو تليفوناتهم أول ما يقومو من النوم, حاول تغير العادة هاذي. على خاطر الأخبار اللي نتلقاوها من مواقع التواصل الاجتماعي ساعة استيقاظنا تأثر على عقولنا طول النهار وتسببلنا التوتر بسبب رفع هرمون الكورتيزول.
3) نظم فرشك
تنظيم الفرش حركة ما تاخوش دقيقتين من وقتنا, لكنها تنجم تحفزنا طول نهارنا وتخلينا نحسو براحة نفسية باش ننطلقو في تنفيذ مهامنا اليومية. تنظيم الفرش يحفز مكان المكافأة في الدماغ ويخلينا نحسو بالرضاء النفسي ويخلي دماغنا متحفز للقيام بمهام أخرى.
4) تمشى
كيف تتمشى لمدة 10 دقائق الصباح يخليك تحس بطاقة إيجابية كيما تعاوننا رؤية المناظر الطبيعية على تحسين مزاجنا وتقليل التوتر. ويحسن المشي أدائنا المعرفي طول النهار.
في النهاية, تغيير العادات والخروج من الروتين يحسن من حياتنا, فحاول تتخلى على العادات الغير جيدة لصحتك.
سارة البلومي