هل ننجمو نعيشو عمر أطول!
أثبتت عديد الدراسات إنو التغييرات المناخية اللي يعيشها العالم تأثر بشكل سلبي على صحة الإنسان، لكن زادا توجدت دراسات أخرى جديدة تأكد إنو البيئة الإجتماعية الي يعيشها الفرد و النظام الغذائي الي يعتمدو ينعكسو بشكل مباشر على صحته الجسدية و النفسية و على طول العمر . لذلك يلزمنا نعرفو كيفاش نختارو نمط حياة منظم يمكنا من تفادي المشاكل الصحية هذه.
هذوما بعض النصائح الي يقدهم الدكتور الياباني “شيجياكي هينوهارا” في عمر 105 أعوام، و الي تنجم تخليك تعيش عنر أطول بكلو سعادة و صحة جيدة .
1) إستحفظ على لياقتك البدنية
السمنة هي من بين العوامل الي تنجم تسبب في عديد الأمراض الخطيرة كيما أمراض القلب و السكر و ضغط الدم غيرو… كيما زادا تاثر بشكل سلبي على حياتك الإجتماعية و المهنية ، لذلك يلزمك تحافظ على وزن جسمك و تعتمد نظام غذائي متوازن و منظم
2) قوم بأنشطة رياضية
الرياضة من الأنشطة الي عندها برشا فوائد جسدية و نفسية ، فهي تخليك تحرق أكثر سعرات حرارية و تزيد في ضخ الدم في الجسم و تنقص في نسبة الكوليستيرول في البدن و تبعد عليك برشا امراض.كيما زادا تساهم الرياضة في إنها تخليك تبعد على الإكتآب بم إنها تساهم في إفراز هرمون السيروتونين (Serotonin)الي يعمل على تحسين المزاج والاسترخاء.
3) تحرر من الضغوطات النفسية
الضغط النفسي يزيد في سرعة و شدة نبضات القلب ، كيما زادا يخلي الإنسان أكثر عرضة للنوبات القلبية و السكتة الدماغية . لذلك لازم تحاول تكتشف المشاكل و الضغوطات النفسية الي متقلق منها و تحاول تفهمها و تقوم بعملية غربلو ليها و تتخلص منها. كيما تنجم تبعد على القلق هذا من خلال التأمل و ممارسة أنشطة تحبها كيما الإستماع للموسيقى ، المشي ، زيارة البحر و بلايص طبيعية .
4) تجنب التفكير في المستقبلو خلي افكارك إيجابية
الإنسان تعود بالفطرة يخاف من المستقبل لإنو ماعندوش سلطة عليه، لذلك حاول تبعد على الأفكار السلبية هذه و تتجاوزها من خلال التركيز على الحاجات الباهية الي تعيشها في الحاضر و تفرح بيها، لإنو خوفك من المستقبل ما ينجم يبدل شي في حياتك غير انو يضر صحتك اكثر .
5) أقعد مع عباد تحبهم
الاشخاص الإيجابيين في حياتنا و الي نحبوهم يزيدو في هرمون السعادة في جسمنا . وجودهم يخلينا نجمو نفضفضو و نضحكو و نتعلمو حاجات جديدة و نتبادلو الخبرات، بالتالي تحس بالرضا على روحك .
6) نظم وقتك
النظام هو أساس النجاح في الحياة ، من المهم ان. تحط خطة منظمة للحاجات الي تقوم بيها كل يوم ، الحاجة هذه تخليك تخمم بشكل متوازن و تساهم في زيادة نشاطك و الإنتاجية و في تحقيق أهدافك الي تسعالها.
7) خليك مصدر إلهام لروحك
من الضروري إنو تحس إنك شخص فريد من نوعو و مختلف على الآخرين ، الحاجة هذه تساهم في زيادة الثقة بالنفس و الرغبة المتواصلة في النجاح و حب الذات .
الأخطاء و العادات الغالطة الي نعيشوها في حياتنا ما تعنيش نهاية الدنيا بم إنو نجمو نصلحوها و نتغلبو عليها و نختارو الطريق الصحيح بش نعيشو عمر أطول بكلو سعادة و صحة جيدة.
سارة البلومي