هل نمّر بأزمة فضيلة ؟ وكيف يمكن أن نعلّم أطفالنا القيم ؟
رابع محور نقاش كتاب البوك كلوب للشهر هذا مع حمزة البلومي يهزنا لموضوع يهم تربية الأطفال ودور العائلة فيه وهو “كيفاش نعلموا أطفالنا القيم ؟”
يأكد مارك مانسون مؤلف كتاب “خراب : كتاب عن الأمل” على دور العايلة في تعليم الأطفال القيم، القيم اللي من بعد باش تحدد هل ان “الطفل” اللي باش يتحول ل”مراهق” هل باش يبقى “مراهق كبير” و الا “شخص ناضج ملتزم بالقيم وبالفضيلة.
وبما انو حاليا نمر بأزمة في الفضيلة وفي القيم وأبرز مثال اليوم نعيشوه وقت اللي نطرحوا السؤال التالي
- هل احنا قادرين اليوم على تعليم الاطفال قيمة إحترام الأكبر سنا؟
- هل احنا قادرين اليوم على احترام قواعد الطرقات في الوقت اللي الطفل ينجم يشوف والديه قاعدين يتجاوزوا في القانون ؟
وبالتالي نرجعوا للنقطة اللي ركز عليها الكاتب انو التربية لازم تكون بالمثال وبالقدوة.
“التربية بالمثال” اللي ما تنجمش تعدي سنوات و إنت تستعمل في أسلواب المقايضة و عقد الصفقات مع ولدك و الا بنتك ثم تطلب منو انو يغير سلوكه في لحظة و يلتزم بالمبادئ لانو مراهق.
ويركز مانسون على العالم المتقدم اللي بالنسبة ليه الازمة الحالية ماهاش أزمة ثروة و إلا فلوس اما يعيش في أزمة فضيلة ، أزمة قيم ،أزمة شخصية. في الوقت اللي احنا اليوم نعانيو من ازمة ثروة و مال و معاها ازمة قيم و فضيلة.
.
و أنت شنوا رايك في طرح الكاتب “كيفاش نجموا من جديد نرجعوا لبعض قيم الفضيلة ولبعض القيم الأخلاقية ؟” إلتحق بينا في النقاش و شاركنا رايك.