كيفاش تأثر تجاربنا على قيمنا ومبادئنا؟
ثاني محور نقاش البوك كلوب للشهر هذا مع حمزة البلومي هو موضوع “كيفاش تأثر تجاربنا على قيمنا ومبادئنا؟“
يأكد الكاتب انو القيم اللي نأمنوا بيها هي نتيجة تجاربنا اللي عشناها ولهنا يقسم القيم لزوز أنواع .
- قيم إيجابية : متأتية من التجارب الناجحة.
- قيم سلبية : نتيجة تجاربنا الفاشلة.
ويعطي مثال للتفسير “فتاة تربطها علاقة عاطفية بشاب لكن الشاب ما يقدرش الحب هذا و يختار الخيانة ، فالصورة اللي ترسمها الفتاة في مخيلتها و تولي مؤمنة بيها “الحب غير موجود وهو وهم “و لهنا تتولد عندها نقمة على قيمة” الحب” و بالتالي وقت اللي نمرو بتجارب ، دماغنا هو اللي يعاود يرتب القيم متاعنا. هذاكا أعلاه يركز الكاتب على أهمية التجارب الأولى في الحياة اللي تنجم تأثر علينا بقية حياتنا ولأخر يوم فيها.
كيما يبين مارك مانسون ويرجع للتذكير بالنظرية اللي بنا عليها الكتاب واللي كانت محور نقاشنا الاول وهو ” هل تعلم أنك تقرر بدماغك “العاطفي” وموش بدماغك “المفكر” ؟
بما انو دماغنا المفكر يطلق الأحكام من خلال الملاحظة والمنطق ويطرح مجموعة من الأسئلة ويحلل باش يوصل ويعتبر انو التجربة اللي عاشها ما يلزمهاش تأثر على قراراتو في حين انو دماغنا العاطفي يخلق القيم من خلال التجارب وتفاصيلها.
ورغم أنو مانسون بيبن انو القصص اللي نمروا تترك علاماتها الا أنو يقول انو ما يلزمش نحتفظوا بالقيم السلبية لمدة طويلة لانو كل ما طولنا في الإحتفاظ بيها كل ما شدينا فيها كل ما تحولت لقيمة أساسية عندنا وبالتالي باش تلعب دور كبير في أحكامنا وقراراتنا من بين الحلول:
- نعاودو نراجعوا القصص القديمة ونحللوها باش نفهموا علاش فشلت ؟
- نحطوا تصور لتجاربنا القادمة وبالتالي باش نكونو نحنا المتحكمين فيها بناء على قيمنا الإيجابية اللي إستخلصناها.
وإلتحق بينا في النقاش.
و أنت شنوا رايك في طرح الكاتب و شاركنا رايك في ” كيفاش تأثر تجاربنا على قيمنا ومبادئنا؟”