هكا تنجم تقنع أي شخص بشراء منتوجك
كلنا سمعنا الجملة الشهيرة اللي تقول “المنتوج الباهي يبيع روحو”, أما تقنيات البيع تبدلت وزيد كثرة العرض وتشابه المنتوجات صعبو مهمة اقناع الشاري. لذلك مهارة الاقناع والتسويق من أهم الصفات اللي يلزمهم يكونو عند اي شخص يخمم يخدم في مجال المبيعات والا يروج لمنتوجاتو.
هاذوما بعض النصائح اللي ينجمو يعاونوك تقنع الشاري بطريقة ذكية؟
1) اطلع على تقنيات البيع الجديدة
مجال التسويق هو من بين اكثر المجالات اللي ديما تشهد تغييرات وتطورات, لذلك من المهم برشا أنو صاحب المنتوج يكون على اطلاع بكل التغييرات والتقنيات الجديدة في عالم التسويق. تنجم تلوج عالانترنيت تلقى برشا محاضرات تسويق وطرق جديدة للبيع تواكب التطور اللي يشهدو السوق وتوظف التكنولوجيا في التسويق.
2) اطرح اسئلة على زبائنك
حاول تعرف أكبر قدر من المعلومات على الشاري, اطرح عليه بعض الاسئلة و وري اهتمامك بتلبية الطلب متاعو وحل مشكلتو من خلال منتوجك. هذا يخلي الشاري يعطي ثقة فيك وفي المنتوج متاعك.
3) سوق منتوجك الكترونيا
أغلب عمليات البيع والشراء أصبحت تصير الكترونيا, والناس تعودت على البحث في الانترنيت على المنتوج اللي يلبي احتياجاتهم والمناسب لحل مشاكلهم. لذلك مهم برشا انك تخلي معلومات على المنتوج متاعك على الانترنيت وتنجم زادة تشارك أراء الناس في منتوجك والا تجارب بعض الاشخاص اللي شراو من عندك, على خاطر رؤية نجاح المنتوج من خلال تجارب واقعية يعطي مصدقية أكثر لفاعليتو.
4) قدم نصائح
السر باش تبيع اي حاجة لاي شخص, هو عدم محاولة بيع أي حاجة لأي شخص, بمعنى أنو حاول تخلي اهتمامك الكل على الشاري وليس المنتوج, أعرف مشكلتو وقدملو نصيحة لحل المشكل متاعو ومن خلال النصيحة هذيكة تنجم تحكي على فاعلية منتوجك وتسوقلو بطريقة غير مباشرة وذكية.
5) تجنب المغالطات
الاصعب من بيع المنتوج هو كسب ثقة الشاري وضمان انو باش يرجع يشري من عندك مرة اخرى. اسهل طريقة لكسب ثقة الشاري هي انك تكون صادق بشأن مدى قدرة منتوجك على تلبية حاجة الشاري, بمعنى انو اذا منتوجك مايناسبش الشاري, قلو أنو المنتوج مايناسبوش وتنجم تطرح عليه نوع اخر من المنتوجات اللي ينجم يلبي احتياجاتو. هذا يخليك تكسب مصداقية كبيرة عند الناس ويخلي سمعة منتوجاتك جيدة في السوق.
النصائح هذوما ينجمو يكونو فعالين ويعاونوكم تنميو مهارات التسويق متاعكم, لكن مع التغييرات اللي يشهدها مجال التسويق يلزم ديما نكونو متطلعين على المستجدات في المجال هذا ونواكبو التغيرات اللي تطرأ عليه.
سارة البلومي