كيفاش نصنع مالغرام خدمة؟
برشا يكونو حايرين في مستقبلهم و مصيرهم المهني كيفاش بش يكون, و يلقاو رواحهم ضايعين مش عارفين وين ماشين و لا كيفاش يوصلو يحققو أهدافهم, في الوقت لي ينجمو يستغلو غرامهم و مواهبهم و تكون هي مورد لرزقهم.
استطلاع قامت بيه مؤسسة “وايز براند” شاركو فيه أكثر من 2000 موظف مستقل تحت عنوان “خطاب أمة الموظفين المستقلين” يكشفلنا انو “الأعمال الحرة خيار مستدام و ممتع و مربح في عالم الأعمال” .
و بخصوص العمل الحر يقول المدير التنفيذي للشركة “أورلي ايزاكي” كونو تقريبا 55 مليون أمريكي و أضعافهم حول العالم -في الشركات الصغرى و لا في الأعمال الحرة- ولي يعادلو 35 فالمئة مالقوة العاملة في الولايات المتحدة الأمريكية .
اذا كنت واحد مالموهوبين و لا المغرومين بحاجة معينة ما عليك كان تبع الخطوات البسيطة هاذي :
1/ عندك منتج تصنع فيه يدويا و مش لاقي رواج كبير ؟
حط استراتيجية للخدمة متاعك بش تسوق بيها للمنتوج و تعرف الناس عليها.
حاول تتميز عالموجود في السوق لأنو المنافسين برشا و الحريف يحب يشوف حاجة سبيسيال مش متعود عليها.
2/ مغروم بالرياضة ولا الفنون؟
كون انتي المدرب و الرسام و الموسيقار و الجنان, أعمل فيديوات و انتي تمارس فالهواية متاعك.
3/ اخدم على مواقع التواصل الاجتماعي و المنصات باختلافاتها
بش توصل لي تعمل فيه للناس و المتابعين متاعك و يتشاف أكثر ما يمكن.
4/ صور, اكتب,هبط المحتوى لي عندك و أبعثو للناس , ابدا من صحابك و عايلتك و استنا ردود الأـفعال و ارائهم فلي تعمل فيه
الخدمة كي تكون غرامك مش بش تحس فيها بقلق و لا بضغط لأنك انتي مدير نفسك و تخدم ما غير رقابة و هذاكا علاش الخدمة الحرة تخليك تبدع في الحاجة لي تعمل فيها لأنها جات عن حب و شغف مش توتر و غصب.
ثرية الريماني