كيفاش تهيأ ولدك باش يستقبل خوه الجديد؟
في العادة أول صغير في العائلة هو الي يحظى بحب و اهتمام الناس الكل وهذا الي تخليه يحس بقيمتو أكثر و تزيدو ثقة في نفسو. لكن تنجم ساعات ترسخ فيه الأنانية و يرفض انو يقسم الحب هذا مع شخص آخر ، على هذاكا كيف ينزاد صغير جديد في العايلة يولي الطفل الأول يتصرف بعدوانية و عنف و هوني يجي دور الوالدين الي لازم يتصرفو بحذر كبير مع الحكاية هذه.
و هذوما حاجات لازم الأم و الأب يعتمدوهم فباش يهيؤو صغيرهم لاستقبال أخ جديد ليه.
1)اعلام الصغير بالحمل قبل كل شيء
مهما كان عمر صغيرك ,من المهم انك تعلمو بالحمل و الي باش يجيه خو أصغر منو على قريب , و طريقة الاعلام في اللحظة هذه لازم تكون فيها راحة و فرحة خاتر الطاقة هذه هي الي بش تتعدا لطفلك و تخليه يتقبل الفكرة و هو زادا يفرح و يتشوق. و الأم و الأب لازم يردو بالهم و ما يخليوش أي شخص اخر يحكي مع صغيركم بخصوص المعلومة هذه قبلهم , خاتر تنجم تصير صدمة للطفل و نفسيتو تتعب.
2) اسمع رايو في الموضوع:
حاجة مهمة برشا انك تخلي صغيرك يطرح عليك الأسئلة و يحاول يفهم الموضوع أكثر و انك تسمعو مليح و تعطيه الفرصة بش يقول رايو بكل راحة ,الشيء هذا يخلي الخوف متاعو من الحكاية ينقص . حاول زادا تجاوب على أسئلتو الكل و انت تتبسم هكا تخليه يرتاح و يحكيلك على الأفكار الي تدور في راسو.
3)هز صغيرك معاك للطبيب:
وقت يبدا عندك فحص طبي , حاول يكون صغيرك حاضر معاك هكا ينجم يسمع دقات قلب خوه و مشاعرو تتحرك تجاه و حتى الطبيب ينجم يرتحو كيف يحكيلو على حالة الصغير الي بش يجيكيما زادا يهنيه على حالة أمو الصحية . التجربة هذه مهمة برشا لطفلك الأول تخليه يحس انو مهم و ما يحسش بالغيرة .
عبير العقربي