كيفاش تكتشف موهبة صغيرك؟
الصغار الكل يتولدو بنفس نسبة الذكاء وطاقة الاستيعاب الذهنية, لكن نشأتهم و طريقة تربيتهم هي اللي تفرق وتخلي صغير يولي متفوق على صغير أخر في الذكاء الدراسي, الذكاء العاطفي أو في الموهبة والنشاط. وإذا نحبو صغارنا يكونو مميزين من المهم برشا نكتشفو مواهبهم في عمر صغير باش نعطيوهم التأطير والرعاية اللازمة.
هذوما نصائح يخليوك تكتشف موهبة صغيرك:
1) شنوة معناها صغير موهوب؟
يعرف معجم كمبري الموهبة بأنها القدرة الطبيعية على فعل حاجة معينة بمهارة من غير ماتكون تعلمتها. كيما يعرف الناس الموهوبين بأنهم عندهم مستوى كبير من المعرفة أو الكفاءة في مجال أو أكثر مثلا في الرياضة, الموسيقى,اللغة,الرسم, التعبير الجسدي… وغالبا الصغير الموهوب يكون مميز على أندادو بأنو ينجم يعمل حاجة بمهارة أكثر منهم أو يعرف يعمل حاجات موش أي صغير ينجم يعملهم. الصغار الموهوبين يتميزو بذاكرة قوية وقدرة على التركيز لوقت طويل.
صحيح الموهبة هي حاجة فطرية يتولد بيها الصغير, لكن من غير تطويرها تنجم تضيع.
2) كيفاش نعرف موهبة صغيري؟
الموهبة تظهر في البيئة المناسبة, يعني يلزم الوالدين يوفرو لأطفالهم الظروف النفسية والتعليمية المناسبة باش الصغير يبدى يوري في مواهبو واهتماماتو. لكن أفضل وقت تنجم تكتشف فيه هو الوقت اللي يكون فيه متفاضي و يحس بالملل, الوقت هذا يخترع فيه الصغير حاجة يعملها. لكن فما طرق تعرف تعاون بيهم صغيرك في اكتشاف موهبتو.
- تعرف على اهتمامات صغيرك: الولدين هوما المدرسة الاولى والقدوة الاولى لصغارهم, لذلك تنجم تعرف صغيرك على اهتماماتك والحاجات اللي تحبهم وتشجعو يتعرف على أنشطة أخرى ينجم يختار منهم نشاط يعجبو.
- أحكي معاه بجدية: في العادة الصغار الموهوبين عندهم القدرة على التحدث والنقاش بطلاقة وفضوليين أما ينجمو يحسو بالاحباط اذا تجاهلت أسألتهم لذلك خوذ أسألة صغيرك بجدية وجاوب عليهم.
- شجع مخيلتهم: اذا كان صغيرك جاك بفكرة أو حكاية خيالية, أظهر اهتمام بيها وشجعو على الاستلهام والخروج بأفكار جديدة.
- هزو للمتاحف وللأماكن العلمية: خلي صغيرك ياخو المعلومات من مصدرها ويكتشف العالم بطريقة مباشرة وحاول تعطيه ألعاب ذكاء وحاجات يصنعهم باليد.
الطرق هذي تنجم تخليك تتعرف على موهبة صغيرك لكن تطويرها يبقى مربوط بإهتمامك بيه وتشجيعو.
سارة البلومي