هل نعرفو نرقدو بالصحيح ؟
النوم من الحاجات المقدسة عند التوانسة, لكن أغلبنا ما نعرفوش نرقدو بالصحيح, يا إما نرقدو أكثر من اللازم أو أقل من اللازم برشا. خاصة في فصل الصيف وقت اللي النهار يطوال ويكثر السهر في الليل ونومنا يولي معادش منتظم, وهذا يعرضنا لبرشا أمراض وحتى للموت المبكر.
زعما كيفاش يأثر النوم على العمر اللي نعيشوه ؟
حسب دراسة أمريكية أجريت على مليون شخص فإنو الناس اللي يرقدو سبعة ساعات في الليل عندهم أمل في حياة أطول من غيرهم. كيما كشفت الدراسة أنو النوم لمدة تتجاوز ثمانية ساعات ونص والا اقل من أربع ساعات ونص يزيد في خطر الوفاة المبكرة. لكن فترة النوم المثالي تتغير حسب العمر .
هذا جدول يبين عدد ساعات النوم المثالية لكل شخص
العمر | عدد ساعات النوم |
من 0 الى 3 أشهر | بين 14 و 17 ساعة |
من 4 و 12 شهر | بين 12 و 16 ساعة |
من 1 سنة الى سنتين | بين 11 و 14ساعة |
من 3 الى 5 سنين | بين 10 و 13 ساعة |
من 13 الى 18 سنة | بين 8 و 10 ساعات |
من 18 الى 60 سنة | 7 ساعات |
من 61 سنة فما فوق | بين 7 و 8ساعات |
مخاطر نقص النوم:
إذا كان حسيت برغبة في النوم في وسط النهار وإلا حسيت بضعف في التركيز وميزاجية زايدة, أعرف اللي أنت ما نلتش قدر كافي من النوم. عادة في فصل الصيف ينقص معدل ساعات النوم عند الناس بسبب العلاقة بين الساعة البيولوجية للجسم وحساسية الجسم للضوء. كل ما يتعرض الجسم لضوء النهار بطريقة غير منتظمة يصير خلل في إفراز “هرمون الميلاتونين” في العقل ,الهرمون المسؤول عن الشعور بالنعاس.
على هذاكة النوم في وقت باكر ليلا والاستيقاظ الباكر في الصباح هو الوقت المثالي للنوم على خاطرو يتماشى مع نظام الطبيعة البيولوجي لنمط الحياة.
نقص النوم يسببلنا برشا مشاكل صحية,منها:
- زيادة الشعور بالألم والتعب
- ضعف جهاز المناعة وكثرة الإصابة بالأمراض
- ضعف الرغبة الجنسية
- الهلوسة
- زيادة خطر الإصابة بأمراض القلب
مخاطر النوم الزائد :
يعتبر الشخص يرقد أكثر من اللازم اذا كان تجاوز عدد ساعات النوم المعدل الطبيعي اللي يتماشى مع عمرو. وهذا ليه عدة مخاطر على الصحة من بينها الأمراض التالية:
- القلق
- الاكتئاب
- انقطاع التنفس خلال النوم
- الربو
- اضطرابات الغدة الدرقية
- أمراض القلب
النوم هو الوقت المخصص لراحة أجسامنا وعقلنا, كل ما إحترمنا المدة اللي يستحقها بدننا للراحة كل ما كانت صحتنا الجسدية والنفسية أحسن.
سارة البلومي