علاش تربية حيوان في الدار مهمة؟
البعض يعتقد اللي كيف تربي حيوان معاك في الدار فإنتي قاعد تعاون فيه أو تقدملو في خدمة, لكن في الحقيقة الحيوانات هي اللي تساعدنا ببرشا طرق وتقدملنا برشا منافع أغلبها نفسية, تحسنلنا صحتنا النفسية,تقلل من التوتر وتعاون الصغار على تطوير ذكائهم العاطفي.
هذوما الفوائد متع تربية حيوان في الدار:
1) انقاص التوتر:
موقع “News In Health” مول مجموعة من الدراسات حول علاقة الانسان بالحيوانات و وصل لنتيجة تم نشرها على الموقع تفيد بأنو التفاعل مع الحيوانات يقلل من مستوى الكورتيزول (هرمون مرتبط بالتوتر) ويخفض ضغط الدم كيما تحسن المزاج وتقلل من الشعور بالوحدة. مثلا وقت تمسح على شعر حيوانك يفرز جسمك وجسم الحيوان هرمون “الأوكسيتوسين” هرمون الترابط العاطفي ويسميوه زادة هرمون الحب.
2) تحسين الصحة النفسية:
في دراسة عملها “Human-Animal Bond Research Institute” لقى اللي 74% من الناس اللي عندهم حيوانات أليفة تعززت صحتهم النفسية, كيما توصلو لأنو الحيوانات الاليفة عندها نفس تأثير مضادات الاكتئاب للأشخاص اللي يعانيو من اكتئاب شديد مقاوم للعلاج.
3) تأثير ايجابي على نمو الأطفال:
برشا ناس يمتنعو على تربية حيوان بسبب خوفهم على صحة صغارهم والأمراض اللي ينجمو يسببوهالهم, لكن الدراسات أثبتت أنو الصغار اللي يعيشو مع حيوانات هوما أقل عرضة للإصابة بالحساسية وكل ما زاد عدد الحيوانات في الدار كل ما نقصت امكانية الاصابة بالحساسية.
يأثر وجود حيوان مع الطفل على النمو متاعو, يعاونو في تحسين مهاراتو الاجتماعية والنمو المعرفي متاعو كيما تعاونهم في تحمل المسؤولية والتعاطف وليها تأثير ايجابي على الاطفال المصابين بالتوحد, اضطراب نقص الانتباه وفرط الحركة وحالات أخرى.
مع الفوائد هذي الكل اللي يقدموهالنا الحيوانات يلزم في المقابل نتلهاو بيهم بالقدا ونلقحولهم بإنتضام باش نتفاداو الامراض اللي ينجمو يكونو خطر عليهم وعلينا.
سارة البلومي