طرق يعاونوك تنجح علاج السرطان
السرطان ديما نوصفوه كمعركة لكنها معركة غير عادلة على خاطر المريض يحارب حاجة موش ملموسة, يحارب واحد من أشرس الأمراض في جسمو ويحارب زادة أفكار سوداء وبرشا قلق وأمراض نفسية تنجم تزيد تأزم من حالتو. لذلك فانو وضع خطة علاجية وخطوات لمحاربة السرطان تنجم تعاوننا برشا باش نمنعو من المرض هذا.
هذوما بعض الخطوات اللي ينجمو يعاونو كل مريض في حربو ضد السرطان حسب موقع “verywell health” الامريكي:
1) مراجعة طبيب الاورام
الخطوة هاذي تعتبر بديهية لكن التذكير بيها يبقى مهم على خاطر طبيب الاورام هو اللي ينجم يحددلنا نوع الورم اللي نواجهو فيه واحتماليات النجاة منو وبالتالي نعرفو نوع العلاج المناسب. بعد الحصول على التشخيص والعلاج المناسب من طبيب الاورام, حاول تشوف طبيب اخر وخوذ رأي ثاني, الخطوة هاذي مهمة برشا باش تتأكد انك باش تتلقى العلاج المناسب.
2) كون ثقافة حول مرضك
تكوين مجموعة من المعلومات اللازمة حول المرض متاعك وطرق علاجو تنجم تخليك تحس بالسيطرة على الوضع. لوج على معلومات في الكتب ومن أشخاص نجحو في تخطي المرض قبل, وحتى من أخصائي العلاج متاعك لأنو تكوين خلفية ثقافية على المرض ينجم ينمي ثقتك في التغلب عليه.
3) التزم بالعلاج
بعض مرضى السرطان يصابو باليأس وأحيانا يتخلاو على علاجهم خاصة في المراحل الاولى قبل ما تبدا نتائج العلاج تظهر. هذا أكبر خطأ يرتكبوه المرضى لأنو عدم الالتزام بالعلاج ينجم يأخر أكثر في ظهور النتيجة والا ما يعطيناش النتيجة اللي حاجتنا بيها.
4) قدم لروحك العناية الكافية
الأكل الصحي وممارسة نشاط معين يقللو من احتمالية اصابتنا بالسرطان ويعاونونا زادة على محاربتو والنجاة منو. موش شرط أنو يكون النشاط مرتبط بالرياضة,ينجم يكون نشاط عادي كيما اللهوة بالجنينة والا المشي والا أي نشاط يخلينا نحسو براحة نفسية. وفي وقت الانطلاق في مرحلة العلاج الكيميائي وخسارة الشعر فإنو التجميل ولبس الشعر المستعار ينجم يخلينا نحسو بمزاج أحسن ورغبة أكثر في العلاج.
5) تلقى الاحاطة والدعم اللازم
دعم العايلة, الاصدقاء والاشخاص الناجين من السرطان هو مرحلة مهمة برشا من العلاج. أثبتت الدراسات أنو الاحاطة والدعم النفسي من الاقارب والاصدقاء يعاون المريض باش يحس بالقوة والثقة. كيما أثبتت الدراسة انو الاشخاص المصابين بالسرطان اللي يتلقاو دعم اجتماعي عندهم امكانية أقل ب 25% من فشل العلاج.
6) تلقى الدعم النفسي
العناية بالصحة النفسية هو نصف علاج السرطان, فما أشخاص بمجرد سماعهم بإصابتهم بالسرطان يدخلو في دوامة من الاوهام والافكار السوداء اللي ينجر عنها محموعة من الامراض النفسية. لذلك زيارة أخصائي نفسي تنجم تعاوننا في حربنا ضد السرطان وتخلي صحتنا النفسية مستقرة.
في النهاية, الاصابة بالسرطان هي من أصعب امتحانات الحياة اللي تمر على الانسان, لكن التعامل الصحيح مع المرض والحفاظ على المعنويات العالية يحسن في فرص نجاحنا في حربنا ضد المرض الخبيث.
سارة البلومي