سرطان الثدي عند الرجال
برشا ناس يعتقدو انو سرطان الثدي مربوط بالنساء كهو , لكن الحقيقة هي انو الرجال زادا ينجمو يكونو معرضين في أي لحظة للمرض هذا , صحيح بنسبة قليلة برشا 1%, أما ساعات تنجم تنجر عليه حالات خطيرة, هذاكا علاش من المهم ياسر توعية الرجال بنوعية السرطان هذه و طرق معرفتو و أهمية الكشف المبكر عليه.
و هذا كيفاش نجمو نتعرفو على أعراض سرطان الثدي الفئة الرجالية و أهم أسبابه:
1) أهم الأسباب:
- العوامل الوراثية : 15% من حالات سرطان الثدي عند الرجال سببها وراثية من نوع ” متلازمة كلاينفلتر” و هو اضطراب وراثي تكون فيه مستويات الأندروجين, و الي هو هرمون ذكووري, منخفضة و مستويات هرمون الاستروجين الأنثوي مرتفعة . على هذاكا من المهم اذا كانم عندك أكثر من فرد من العايلة, خاصة الأم , تعرضو للمرض هذا, انك تقوم بالفحوصات الازمة و تتفقد بدنك.
- صور شعاعية: كثرة القيام بالتصوير بالأشعة أو تعرضك برشا مرات لاشعاع الآلات الطبية , تنجم تساهم في خطر الاصابة بسرطان الثدي , هذاكا علاش لازمك تقوم بالحاجات هذه كان وقت الضرورة و مش بصفة متكررة .
- تليف الكبد: المرض هذا في أغلب الأوقات يساهم في ارتفاع هرمون الاستروجين الأنثوي و انخفاض نسبة نسبة الهرمونات الذكورية و ينجم زادا في الحالة هذه يضر أعضاء ذكورية أخرين مش الثدي كهو .
2)الأعراض :
أعراض سرطان الثدي عند الرجال ما تختلفش برشا على الي نلقاوها عند الفئة النسائية و هذوما أهمهم:
- كتل في الثدي ما يوجعوش
- تغيرات في الحلمة و الا كيما انها تتقلب لداخل و الا يبدا فيها قشور و الا وجود افرازات
- تقرحات في الجلد
- انتفاخ الغدد
3) العلاج :
طرق علاج سرطان الثدي الرجالي ما تختلفش برشا على العلاجات الي تطبق على النساء و الي تتمثل أساسا في يا الجراحة إمّا للثدي المريض أو العقد اللمفاوية و يصير بعدها المعاجة الاشعاعية باش يتخلصو من أي خلايا سرطانية متبقية بعد العملية . كيما زادا نلقاو العلاج بالهرمونات و المعالجة الكيميائية , و أكيد الوجحيد الي يقرر طرق العلاج الي تمشي مع كل مريض هو الطبيب المختص في نوعية الأمراض هذه, هذاكا علاش من المهم انك تتفقد روحك لو حسيت بالشك و تزور طبيب.
عبير العقربي