رحلة قطر نحو تنظيم كأس العالم
قطر حققت الحلم في تنظيم كأس العالم, بعد افتتاح مبهر في ملعب البيت, قدمت فيه عروض موسيقية وثقافية عكست من خلالها الثقافة العربية وكسرت الصورة النمطية الرائجة على العروبة. كيما دعت قطر العالم باش يتوحدو تحت الخيمة اللي تمثل العالم ويجتمعو على قيم الاحترام والمحبة. وقدمت في افتتاح البطولة عروض بتقنيات بصرية متطورة تستعمل لأول مرة في افتتاح كأس العالم.
وهكا وفات قطر بوعودها اللي قدمتها للفيفا من 12 سنة:
1) تقديم مطلب الاستضافة:
الحلمة بدات بطلب قطر عام 2009 من الفيفا شرف تنظيم أكبر تظاهرة في رياضية في العالم, وكانت وقتها الدولة الوحيدة اللي قدمت لتنظيم مونديال 2022 ونافستها في ذلك دول كبيرة طالبت هي زادة بتنظيم البطولة كيما أسترالية, أمريكيا, بريطانيا, المكسيك, كوريا الجنوبية… وفي 2010 أعلنت الفيفا على الدول المنظمة لمونديال 2018 و2022 وتحقق حلم قطر في استضافة المونديال كأول دولة عربية وأصغر دولة تنظم البطولة. ومن هنا بدات الخدمة.
2) وعود قطر للفيفا:
الوعود اللي قدمتها قطر في الملف متاعها للفيفا حول تنظيم التظاهرة كان ليها دور كبير في فوز قططر بالتصويت لصالحها, الوعود هذي تتمثل في :
- اعتماد تقنيات حديثة في تبريد الملاعب ومناطق تدريب الفرق ومناطق المشجعين وحرارة الاماكن هذي موش باش تتجاوز 27 درجة.
- منح 170 ألف كرسي من مختلف الملاعب اللي استضافت المبارايات للدول النامية بعد نهاية البطولة.
- بناء مرافق أساسية وملاعب حديثة لإستقبال البطولة والمشجعين من كل أنحاء العالم.
من بين الحاجات اللي دعمت ملف قطر هو تاريخ تنظيم قطر الناجح للبطولات الدولية كيما كأس العالم للشباب 1995, الألعاب الأسيوية 2006 كيما ذكرت أنها باش تنظم كأس أسيا لكرة القدم ودورة الالعاب العربية 2011.
3) قطر تفي بوعودها:
بدات الخدمة من 2010, وانطلقت قطر في بناء الملاعب, أولهم كان ملعب الجنوب اللي صممتو المهندسة العالمية الراحلة “زها حديد” واللي مستوحى من القوارب الشراعية التقليدية.
2017 دشنت قطر ملعب خليفة الدولي, 2019 افتتحت ملعب الجنوب, 2020 ملعب أحمد بن علي وملعب المدينة التعليمية اللي خاضت فيه تونس مباراتها الافتتاحية ضد الدنمارك, وعام 2021 افتتحت ملعب الثمامة وملعب البيت. أخر ملعب تم تدشينو هو ملعب لوسيل, درة الملاعب كيما يلقبوه, هو أكبر ملعب من ناحية طاقة الاستعاب اللي توصل ل 80 ألف متفرج وهو الملعب اللي باش يحتضن المباراة الختامية. وما ننساوش ملعب 974 المبني من حاويات السلع وهو الملعب الوحيد في العالم اللي يمكن تفكيكو.
الملاعب هذي الكل فيها نظام تكييف استثنائي موش موجود في حتى ملعب في العالم, ومبني بمعايير تحترم ذوي الاحتياجات الخصوصية وتوفرلهم كل التجهيزات باش يحضرو المباريات كيما الناس الكل.
بالنسبة للبنية التحتية, خصصت قطر مدينة كاملة فيها الملاعب ومناطق المشجعين في منطقة 55 كلم, كيما خصصت 3 ميتروات متطورة لنقل المشجعين و دشنت عام 2014 مطار حمد الدولي لإستقبال الرحلات الدولية وحاز على جائزة أفضل مطار في العالم سنة 2022.
وهكا تكون قطر وفات بكل الوعود اللي قدمتها للفيفا.
سارة البلومي