خطوات تعاونك باش توفر من شهريتك
المشاكل المادية هي من أكثر أنواع المشاكل اللي يعانيو منها أغلب الناس, وخاصة المعضلة العظمى”الشهرية” اللي قليل وين نلقاو شكون ينجم يفضل منها. المشاكل المادية تأثر سلبيا على نفسيتنا وتسببلنا التفكير الزائد خاصة وقت ما نجموش نوفرو المال الكافي باش نشريو الحاجات اللي نحبو عليها. اذا انت من الناس اللي تواجه مشاكل في المصروف, النصائح هذوما ليك.
1) حدد ميزانية
أول خطوة هي حساب المبلغ اللي تصرفو كل شهر, أعمل ورقة وستيلو وأكتب الحاجات الاساسية اللي تستحقها كل شهر من يعد حدد المبلغ اللي تستحقو شهريا حسب مصاريفك, تنجم تتوصل للمبلغ هذا بعد برشا محاولات, جرب كل شهر خلي مبلغ معين للمصروف وشوف هل يكفيك لأخر الشهر والا لا, بعد برشا محاولات توا تتمكن من ضبط مصاريفك على حسب شهريتك.
2) قسم مصروفك
قسم شهريتك بضبط ميزانية لكل حاجة, ميزانية الفواتير, ميزانية المواصلات,التعليم,الكراء, لوازم منزلية وغيرها من المصروف واذا كان عندك عايلة, حدد ميزانية لكل فرد مسؤول عليه. اذا كان لقيت مصاريفك أكثر من مدخولك, شوف شنوة الحاجات اللي تنجم تستغنى عليهم ونقصهم من مصروفك. هكا تنجم تكتشف مصاريف مبالغ فيها تنفقها على بعض الحاجات اللي نجمو نقصو منها.
3) أبدى في الادخار
اذا كان تمكنت من توفير جزء من شهريتك بعد اعتماد الخطوات السابقة, حاول تدخر المبلغ اللي وفرتو حتى اذا كان مبلغ صغير, تنجم تستعمل خدع العقل هنا, اقتنع أنو شهريتك على قد المصروف اللي تنفقو بالضبط وأنو ما عندكش فلوس مدخرة باش ما تحاولش تصرف منهم في أول أزمة.
اذا كان مانجحوش الخطوات هذوما معاك في أول مرة ما تحسش بالفشل,مع التجارب المستمرة شهريا تنجم تنجح في تحديد الميزانية اللي لازمتك وتضبط مصروفك.
سارة البلومي