حامل و مغرومة بالرياضة ؟ هذوما رياضات مهمة ليك
ممارسة الرياضة حاجة مفيدة لصحتنا. لكن شنوة بالنسبة للنساء الحوامل؟ العديد من النساء يخافو من إيذاء الجنين و إلا إجهاضو أو حتى الولادة المبكرة . فما برشا معتقدات على هل أنو المرأة الحامل تنجم تلعب رياضة و إلا لا ؟
كانك إنتي من النساء إللي ما ينجموش يتخلاو على ممارسة الرياضة لكنك حامل, هذوما الأنواع إللي تنجم تقوم بممارستهم خلال فترة حملك.
فوائد ممارسة الرياضة في فترة الحمل
إذا إنتي في صحة باهية و حملك ماهوش معقد فإنو ممارسة الرياضة تعاونك باش تقوي بدنك و تمنع زيادة الوزن كيما تخليك ترتاح نفسيا و ذهنيا و تخليك تتعرض لمضاعفات أقل في الولادة.
كيما أنو ممارسة التمارين الرياضية المنظمة تقلل من خطر إصابتك بأمراض القلب، ومرض السكر من النوع 2 .
تساهم ممارسة الرياضة في تفادي أعراض الحمل إللي تتعرضلها و إللي تقلقك كيما آلآم الظهر كيما الرياضة تخليك ترقد مرتاحة .
لكن بالطبيعة مادام إنتي حامل لازمك تتجنب أنواع معينة للرياضة و فما أنواع تنجم تمارسهم في فترة حملك ما يضروكش و لكن ينفعوك إنتي و جنينك.
فمثلا كيما الرياضة إللي تستحق القفز و الرياضة إللي تخليك في ارتفاعات عالية و إلا الرياضة إللي فيها خطر أنك تطيح و الرياضة إللي تعبك برشا و تخليك تسخن و تعرق.
الرياضة الجماعية زادة غير محبذ ممارستها و إنتي حامل و رياضة التنس, التزلج وركوب الخيل وتسلق الجبال والغطس.
هذوما الأنواع إللي تنجم تمارسهم :
1 المشي و الجري
حسب تقرير لوزارة الصحة المصرية فإنتي مسموحلك بممارسة المشي الخفيف و إلا المسرع ويعتبر المشي من الرياضات الآمنة ليك بشرط أنك تمارسو على أرض ملائمة و موش مرتفعة و على هذا أحسنلك تمشي في النوادي كيما تنجم تستخدم جهاز السير في صالات الألعاب الرياضية، تنجم تمارس المشي كل يوم موش أكثر من نصف ساعة لكن تفكر أنك لازمك ترتاح كان حسيت بأي تعب و إلا إرهاق.
لازمك تمارس المشي بعد الفطور بساعتين، و ما تنساش تهز معاك دبوزة ماء و إلا عصير.
لازمك تعرف أنو المشي يعاونك تستحفظ على لياقتك الجسدية و وزنك المناسب في الحمل . أما بالنسبة للجري فهو واحد من أحسن الرياضات للقلب والبدن عموما حتى ليك إنتي كامرأة حامل تنجم تمارسها ، ولكن كيما ينصحو الأطباء في العادة فإنو مسموحلك بالجري بعد الشهر الثالث وموش أكثر من 15 دقيقة.
2 السباحة
تعتبر السباحة رياضة من الرياضات الباهية للقلب والرئتين و من أهم فوائد الماء هو أنو يخليك تحس بالخفة والنعومة والراحة وينقص من الانتفاخ في القدمين.
لكن حاول ديما و إنتي تمارس في السباحة يكون معاك مدرب و إلا مدربة كيما تنجم ترافقك واحدة من أصحابك احتياطا من أي شيء تنجم تتعرضلو كيما لازمك تتأكد من اختيار حمامات سباحة نظيفة ونوادي موثوق فيها لمنع انتقال أي عدوى .
3 البيسكلات
مسموحلك تركب بيسكلات في صالات الألعاب الرياضية، كيما مسموحلك تركب بيسكلات عادية لكن على شرط أنك تسوقها في كياسات آمنة تجنبا للسقوط، وما لازمكش تزيد على ربع ساعة يوميا.
4 اليوغا
الكلنا نعرفو أنو اليوغا تعاون على تصفية الذهن و تنقصلنا من التوتر والقلق، بالإضافة لأنها تقوي عضلات البدن و تزيدو ليونة، بالتالي فهي مفيدة لصحتك العامة في فترة الحمل وفي الولادة.
ولاء الحبلي