جرثومة “شيغيلا”
سجلت تونس اليوم حالة وفاة لطفلة بعمر 8 سنين و 69 إصابة أخرى في صفوف الأطفال بجرثومة “شيغيلا” من بداية شهر جويلية حتى لليوم. وأعلنت وزارة الصحة على أعراض الاصابة بيها وكيفية الوقاية منها.
شنوة هي جرثومة “شيغيلا”؟ شنوة أعراضها؟ وكيفية الوقاية منها؟
1) جرثومة شيغيلا:
شيغيلا, جرثومة تمس الجهاز الهضمي للإنسان وخاصة المصارن, ورغم أنو أغلب الاصابات بالجرثومة هذي تسجل في صفوف الاطفال الا أنو الكبار زادة يمرضو بيها. أسباب الاصابة بالشيغيلا أساسا هي ماكلة أو شرب حاجة متعفنة تسبب التهاب في المصارن.
2) أعراض الاصابة:
- جريان الجوف برشا مرات في النهار وخروج دم مع الفضلات
- وجيعة في الكرش
- سخانة
- ردان
3) طرق الوقاية:
- غسل اليدين بالماء والصابون قبل الاكل, وقت التطييب وبعد الخروج من التواليت
- تنضيف بيت الراحة بإسمرار
- شرب ماء نضيف أو بعد ما نغليوه
- ما نخليوش الماكلة من غير غطاء ومانخليوش الذبان يدور بيها
- اذا كان الصغير عندو اسهال, نلوحو الكوش متاعو في حاجة مسكرة مليح ونضفو البلاصة اللي بدلنالو فيها
أغلب حالات الاصابة بالمرض هذا موش خطيرة, لكن يلزم زيارة الطبيب أول ما يلاحظو وجود الاعراض ومايلزمش خاصة التداوي الفردي بالمضادات الحيوية. وفي أخطر الحالات تتسبب للصغار في هبوط حاد في الدورة الدموية, تمس الجهاز العصبي وهو اللي يأدي لدخول الصغير للإنعاش والوفاة في الحالات النادرة.
سارة البلومي