فرص تخليك تقرى في الخارج مجانا!
الدراسة في الخارج هو حلم أغلب التلامذة التوانسة, بإعتبار الجامعات الاوروبية والامريكية توفر ظروف تعليم ممتازة وشهايدها هي الافضل في العالم كيما تحللنا البيبان لأفضل المهن سوق الشغل. حلم الدراسة في الخارج غالبا ما يتوقف على معدل الباكالوريا اللي يلزمو يكون ممتاز برشا باش تتحصل على منحة من الدولة والا تكون عندك برشا فلوس باش تغطي تكاليف السفر, الدراسة والمعيشة في بلد آخر. لكن فما طرق مجانية تنجم تحقق بيها حلمك في الخارج هذوما أشهر الطرق يعاونوك باش تقرى في الخارج:
1) Campus France
هي غالبا أكثر بلاصة يقدمو فيها التوانسة اللي يحبو يقراو في الفرنسا ملفاتهم, التقديم يكون عن طريق المنصة الالكترونية الخاصة بcampus France اللي تتحل لتقديم الطلبات بداية من أكتوبر . باش تقدم طلب في المنصة هاذي لازمك تحمل السيرة الذاتية متاعك اللي يكون فيها رزنامة أعداد السنوات الدراسية الفارطة متاعك, الأنشطة الثقافية والرياضية اللي تعملهم, الرسالة التحفيزية اللي تقدمها للجامعة وقائمة الجامعات اللي تحب تقرى فيهم والتخصص اللي تحب تختارو. الاجراءات هاذي يلزم تعملها قبل الباكالوريا اذا كنت تحب تقرى مرحلة الاجازة في فرنسا وباش تقوي امكانية قبولك يلزمك تخدم على تحسين أعدادك في سنوات ما قبل الباكالوريا. في حال تم قبول المطلب الالكتروني متاعك تتعدى لمرحلة “المقابلة المباشرة” ومن بعد يجاوبوك في شهر أفريل أو ماي قبل نتيجة الباكالوريا يعني معدل الباكالوريا متاعك ما يحددش قبولك او رفضك.
2) Yes program
هو برنامج تبادل يخص تلامذة الأولى والثانية ثانوي يعطيهم فرصة باش يقراو في الولايات المتحدة الامريكية لمدة سنة كاملة ويعيشو مع عايلة امريكية في نفس الدار. باش تشارك في البرنامج هذا يلزمك تعمر طلب الكتروني يكون فيه سيرتك الذاتية وأعداد السنوات الفارطة والطلب هذا يكون قبل شهر أكتوبر. بعد تتعدى للمرحلة الثانية اللي يصير فيها اختبار مستوى في الانجليزية من بعد توصل لمرحلة المقابلة الفردية والمقابلة الجماعية وأخر مرحلة تتقابل فيها مع الناس اللي خاضو التجربة هاذي من قبل.لكن اذا تم قبولك في البرنامج هذا ومشيت لأمريكيا, العام الدراسي هذاكة يتعدالك عام أبيض في تونس.
3) منحة توماس جيفرسون
السفارة الامريكية تقدم مجموعة من المنح للتوانسة تخوللهم الدراسة في أمريكيا, من بين المنح هاذي منحة توماس جيفرسون اللي تعتبر الأسهل والأشهر بالنسبة للتلامذة. الفرصة هاذي تعني طلبة السنة أولى وثانية في الجامعة, تتمثل في عام واحد يقراه الطالب الونسي في جامعة أمريكية يتضمن دراسة وتدريب مهني في شركة أمريكية في تخصص يختارو الطالب. أجال تقديم المطالب في المنحة هاذي هو شهر ديسمبر ولازم يكون عمرك فوق 18 سنة,تكون ناشط في المجتمع المدني, وتكون تحكي وتكتب الانجليزية بالقدا. اذا كان تم قبولك في المنحة هاذي باش تتمتع بتأشيرة سفر, رسوم الدراسة,اقامة ومصروف شهري مجانا.
4) كيفاش نتقبل في البرامج هذوما؟
باش تعزز فرصتك في الدراسة في الخارج, يلزمك تخدم على الهدف هذا قبل ب 3 سنوات على الاقل من اجل التقديم, وأهم الحاجات اللي يلزمك تخدم عليهم هو معدلك العام اللي ما يلزمش يكون أقل من 13 في الثلاث سنوات اللي فاتو ومعدل اللغة الانجليزية اللي ما يلزمش يكون أقل من 14. الانخراط في المجتمع المدني و الاعمال التطوعية, ممارسة رياضة أو هواية معينة وإمتلاكك لمهارات لينة, هاذوما الكل عوامل يساهمو في تحسين الفرص متاعك في القبول في واحد من البرامج هذوما.
هاذم كانو بعض الطرق اللي ينجمو يعاونوك كتلميذ أو طالب تونسي باش تقرى في الخارج, لكن مازال فما عشرات الفرص حول العالم توفرهم السفارات وتنجم تكون وحدة فيهم تناسبك.
سارة البلومي