الوجه الآخر لعائلة Gucci !
“غوتشي” والا ماركة النخبة, وحدة من أكبر وأغلى الماركات في العالم تقدر قيمتها ب 17 مليار دولار. لكن ورا الماركة هاذي وحدة من اغرب قصص النجاح اللي أنقذتها قضية قتل.
1) قصة صعود Gucci
تأسست الماركة على يد “غوتشيو غوتشي” اللي تولد في فلورنسا إيطاليا لأب وأم فقراء يخدمو في صناعة القبعات, انتقل مع عايلتو لبريطانيا في عمر ال 17 سنة وخدم حامل حقائب في فندق وغادي لاحظ طريقة لبس الاغنياء وحملهم للحقائب واهتمامهم بالجودة. رجع غوتشيو لإيطاليا سنة 1901 وبعد الحرب العالمية الثانية دخل يخدم في شركة مختصة في المنتجات الجلدية وتعلم يتعامل مع كل أنواع الجلد. افتتح أول متجر ليه سنة 1921 وكان مختص في بيع الحقائب المستوردة, ومع الضرائب المجحفة اللي فرضها القانون الايطالي على الاستيراد وتراجع جودة الحقائب, قرر “غوتشيو” يستفاد من معرفتو لأذواق الاغنياء ويطلق الماركة متاعو للحقائب. بدى “غوتشيو” في صناعة حقائب اليد والسفر من القماش والجلد ومن بعد وسع في النشاط متاعو وبدى يصنع الصبابط والأحزمة كيما افتتح سلسلة متاجر في أوروبا ونيويورك وولات Gucci علامة على الثراء يلبسو منها أشر الشخصيات وأفراد العائلات الحاكمة.
2) سقوط Gucci
توفى غوتشيو غوتشي بعد افتتاح متجر نيويورك وخلى الماركة بين يدين أولادو الثلاث “ألدو”, “فاسكو “و “رودولفو“. الابناء الثلاثة نجحو في تطوير الماركة وضمان انتشارها في العالم كيما زادو وسعو من منتجاتها باش تشمل الساعات اليدوية والعطور. بعد بسنوات قليلة توفى الاخ “فاسكو” بالسرطان وخلى حصتو في الشركة لزوجتو بما أنو ما كانش عندو أولاد, قام كل من “ألدو” و”رودولفو” بشراء أسهم خوهم من زوجتو وبذلك ولى كل واحد منهم يملك 50% من الشركة.
بعد موت رودولفو تم منح حصتو من الشركة لإبنو الوحيد “موريتسيو”, وأول حاجة عملها ,طرد عمو “ألدو” وبعد عامين شرى موريتسيو كامل الشركة بإستثمار من شركة” Investcorp “لكنو مانجحش في ادارة الماركة وخسرها قرابة 30 مليون دولار في سنة واحدة. وفي عام 1993 عرضت شركة “investcorp “على موريتسيو شراء الماركة بالكامل, لكنو رفض البيع وبعد فترة اختفى تماما حتى لقاو جثتو بعد بعامين في مكتبو في ايطاليا كشفت الأبحاث أنو زوجتو هي اللي قامت باستأجار قاتل باش تتخلص منو.
3) اعادة بناء Gucci
جريمة قتل “موريتسيو” كانت سبب في خروج الماركة من يد العايلة وشرائها من قبل شركة investcorp وين تسلم ادارتها “توم فورد” اللي نجم ينجح الماركة وينقذها بتصاميم متجددة وعصرية. عام 1999 تباعت Gucci للشركة الفرنسية Kering Gucci واليوم الشركة تملك قرابة 490 متجر وتسجل أرباح سنوية تتجاوز 9 مليار أورو.
هاذي كانت قصة الماركة اللي تبنات وتدمرت على يد عائلة Gucci وتم انقاذها بعد جريمة قتل كانت السبب في بيعها.
باش تعرفو أكثر تفاصيل, تفرجو في الفيديو.
سارة البلومي