العلاج الابداعي: وقت يعجز الكلام, يتكلم الفن
كل شخص فينا ينجم يعيش مشاكل صحية أو نفسية أو حتى جسدية فيلتجأ لطبيب و يحاول يلوج على حل لمشكلتو مهما كان نوعها, أما ساعات يبدا الحل و الا العلاج أسهل ببرشا و قدام عينينا و أحنا نتجاهلوه و الي هو الفن بكل ما فيه من صور ابداعية كيما الرسم و الرقص و الكتيبة و المسرح و غيرو…
الحركات الابداعية هذه, على عكس ما يعتقدو برشا ناس, عندها قدرة كبيرة في انها تقوي في المناعة و تعالج المشاكل الصحية بطرق بسيطة المهم انك تكون مقتنع بالفكرة و تخلي لروحك الفرصة انك تعيش التجربة هذه.
و هذوما فوائد الابداع و كيفاش نجمو نعتمدوه باش نتفاداو بعض مشاكلنا الصحية بأنواعها:
1)هرمون الرضا على الذات:
الحركات الابداعية توفا ديما بنتيجة معينة و وقت تنجح باش توصل للنتيجة هذه مهما كانت, البدن متاعك يفرز هرمون اسمو الدوبامين الي يخليك تكون راضي على روحك و الحاجات الي تعمل فيهم و بالتالي نفسيتك تتحسن و تولي تفكر بايجابية أكثر و الي هي تعتبر الخطوة الأولى و الأهم باش تبرى من أي قلق نفسي خاصة .
2)الفن يتكلم:
برشا ناس تعجز انها تحكي على مشاكلها الجسدية و الا النفسية و الا تعبر على مشاعرها, و الفن هوني ينجم يعاون الأشخاص هذوما باش يوصلو الرسالة الي يحبو عليها من خلال الرسم و الا الكتيبة و الا الغناء و الا أي شكل اخر من أشكال الابداع . و مش بالضرورة يكونو الأـشخاص هذوما عندهم أي نوع من القدرات الفنية, المهم انو يحاول يستغلهم بطريقتو باش يعبر على أفكارو و المشاعر الي تراودو .
3) الحالات الطبية الي تتعالج بالابداع:
- الصدمة النفسية
- الضغط العصبي
- الزهايمر
- الاعاقة الجسدية
- السرطان
- الادمان
- الوسواس القهري
عبير العقربي