أهمية العلاج النفسي لمرضى السرطان
السرطان, المرض الخبيث اللي يسيطر على الصحة الجسدية والعقلية للإنسان خاصة بالنسبة للأشخاص اللي كانو يعانيو من مشاكل نفسية سابقا. و في شهر مكافحة سرطان الثدي أكتوبر الوردي باش نحكيولكم على دور الصحة النفسية في علاج السرطان خاصة وأنو أبحاث مؤسسة الصحة النفسية في المملكة متحدة أثبتت أنو 70% /ن مرضى السرطان يعانيو أمراض نفسية.
1) تأثير السرطان على الصحة النفسية:
شائع برشا انو مرضى السرطان يواجهو مشاكل نفسية بسبب تشخيصهم, أغلبهم يواجهو الاكتئاب, القلق و الا اضطراب ما بعد الصدمة واذا كان ما يتلقاش المريض العلاج النفسي المناسب ينجم يتطور الامر ويوصل لليأس والتفكير في الانتحار. الأخطر من هذا أنو الصحة الجسدية والصحة العقلية مرتبطين ببعضهم يعني اذا مريض السرطان يواجه مشاكل نفسية فانو هذا باش يأثر على صحتو الجسدية, أثبتت الأبحاث أنو المرضى اللي يعانيو من أعراض الصحة العقلية عندهم نتائج صحية سيئة أثناء العلاج بسبب أنهم ما يلتزموش بالعلاج وهذا زاد في معدل الوفيات بمرض السرطان وهذا يسلط الضوء على أهمية العلاج النفسي.
2) أعراض تأثير السرطان على الصحة النفسية:
فهم أنو مريض السرطان يعاني من مشاكل نفسية هو حاجة اساسية باش نعاونوه يتلقى العلاج المناسب,لذلك من المهم برشا أننا نحكيو مع مريض السرطان ونسألو على شعورهم العاطفي ونحسسوهم بدعمنا ليهم باش نجمو نفهمو المشاكل اللي يواجهوها.
الاعراض اللي يلزمنا نلوجو عليها عند مريض السرطان هي الحزن, البكاء المستمر, القلق المفرط,العزلة, تغيرات في النوم وشاهية الماكلة, العجز, اليأس والافكار الانتحارية. مهم برشا اننا ما نتعاملوش مع الاعراض هذي كحالة طبيعية تتبع الاصابة بالمرض ونحاولو نعالجوها في أقرب وقت واذا كان تحدث المريض عن أي افكار انتحارية من الضروري انك تستعجل وتشوفلو أخصائي نفسي.
3) كيفاش نعاونو المريض:
غالبا ما يكونو المرضى موش مهيئين لتأثير السرطان عليهم, لذلك لازم كل مريض يكون على وعي بالتأثير هذا وبأهمية الخضوع لعلاج نفسي. ويكون أفضل اذا تلقى المريض النصيحة بزيارة أخصائي نفسي من طبيب الأورام متاعو لأنو يكون على علاقة ثقة بالمريض وينجم يأثر عليه.
ننجمو زادة ننصحو المريض شخصيا بزيارة أخصائي نفسي والا نشجعوه على الانخراط في الجمعيات والا البرامج اللي يوفروها الأخصائيين النفسيين والمجتمع المدني للمرضى. سماع حكايات أشخاص حاربو السرطان وتخلصو منو تنجم تعاون المريض باش يقوي الامل متاعو في الحياة وفي الشفاء.
نتمناو الشفاء لكل مريض.
سارة البلومي