أحمي صغيرك من التنمر
التنمر, أكثر ظاهرة منتشرة في الوسط المدرسي, حسب تقديرات اليونسكو الصادرة في عام 2017, أكثر من 250 مليون طفل حول العالم يتعرضو للتنمر وللعنف المدرسي. الخطير انو التنمر يأثر عللى شخصية الصغير, ينجم يتسبب في ظهور سلوك عدواني على الضحية كيما ينجم يخليه يعاني من اضطرابات نفسية ترافقو في المستقبل, لذلك واجبنا نعرفو كيفاه نتعاملو مع الطفل ضحية التنمر.
هذوما بعض الخطوات اللي نعرفو بيهم اذا كان صغيرنا تعرض للتنمر وكيفاه نتعاملو معاه:
1) أحكي مع صغيرك على التنمر:
الخطوة الاولى والاهم هي التواصل, على خاطرها الحاجة الاسهل اللي نجمو نعرفو بيها هل صغيرنا يتعرض للتنمر أو لا وكيفاه يحس تجاه الموضوع. من المهم برشا اننا نحاولو نحكيو في مواضيع مشابها ونقربو لصغارنا باش يحسو بالاريحية ويحكيولنا على خاطر أغلب الصغار ضحايا التنمر ما يحكيوش لعايلاتهم.
في دراسة أعدوها مجموعة من الباحثين من كلية الطب بسوسة ونشرت سنة 2018 بمجلة Journal of Research in Health Sciences ” حول التنمر في المعاهد والمدارس التونسية, كشفت أنو 33.3% فقط من الاطفال ضحايا التنمر يقولو لعايلاتهم في حين 67.9 % يسكتو والا يقولو لأصدقائهم فقط.
2) ركز مع تصرفات ولدك :
التركيز على تصرفات صغيرك يخليك تلاحظ أي تغيير ينجم يكون بسبب التنمر. عادة الاطفال ضحايا التنمر يشهدو تغير في التصرفات متاعهم مثلا تغير في النوم والماكلة متاعهم, تجنب الذهاب للمدرسة والأنشطة الاخرى, والا الصغير اللي يمرض برشا مرات, اذا لاحظت وحدة من الحاجات هاذي على صغيرك, أحكي معاه وتنجم تسألو مبارة على التنمر.
3) مراقبة الانشطة الالكترونية:
التنمر ما يصيرش كان في الشارع أو المدرسة, ينجم يكون زادة على مواقع التواصل الاجتماعي. لذلك يلزم مراقبة أنشطة الصغير على مواقع التواصل الاجتماعي باش نعرفو هل صغيرنا يتعرض للتنمر والا حتى يتنمر على الناس. تنجم تحدد الوقت اللي يقضيه صغيرك على الانترنيت حسب المنصوح بيه وتخلي الأجهزة الالكترونية في الاماكن العامة.
كيفاش نحمي صغيري من التنمر؟
باش نحميو صغارنا من التنمر والا نعاونو صغارنا اللي تعرضو للظاهرة هاذي نجمو نعلموهم فهم مشاعر الناس اللي دايرين بيهم باش نقلصو فرصة مشاركتو في التنمر والا نفهموه طبع الناس المتنمرين. تنمية مهارة التعاطف تعاون صغيرنا في العلاقات الاجتماعية وتعلمو يحمي روحو.
حط استراتيجية مع صغيرك للتعامل مع التنمر, اذا كان صغيرك يتعرض للتنمر في المدرسة, كلم المدرسة واعلمهم بالسلوك اللي يتعرضلها. ادعم صغيرك عاطفيا واعطيه ثقة أكبر في روحو وفي حال تطلب الامر تنجم تستشير أخصائي نفسي للأطفال أو تشوف معلومات على الانترنيت.
التنمر نجمو نقولو عليه آفة يواجهوها صغارنا كل يوم وما نجموش نمنعوها, لكن بالتربية الايجابيةنجمو نحدو منها.
سارة البلومي