وقتاش نعطيو لصغارنا الالعاب؟
من التحضيرات اللي يقومو بيهم الوالدين لإستقبال أول مولود هو شراء برشا لعب, باش يلعب بيهم والا يتعلم منهم. كلنا نعرفو مقولة “علم الاطفال وهم يلعبون” , لكن أغلب الاولياء ما يعرفوش السن المناسب لتقديم الالعاب لصغارهم باش يستفادو منها.
هذا وقتاش نجمو نقدمو لصغارنا الالعاب وكيفاش تنجم تفيدهم, حسب المدونة وطبيبة الاطفال الامريكية”جيزيل باز”:
1) العمر المناسب للعب:
اللعب هو جزء مهم جدا من نمو الصغير, تنجم تقدم لصغيرك الالعاب ابتداء من الشهر الاول من الولادة وقت اللي الصغير يبدى يتحسس ويكتشف العالم من حولو. الالعاب تنجم تعاون صغيرك في التعلم وفي تطوير مهاراتو الاجتماعية والعاطفية كيما تنجم تعاونو بش يستخدم خيالو أكثر و يكتسب ذكاء عاطفي. لكن التعامل مع الالعاب يختلف حسب العمر وتطور حواس الصغير, يعني أنو الصغير يبدى يلعب باللعب اللي عندو في عمر الستة شهور, كيما رمي الكرة والا تعنيق الدبدوب… في عمر 9 شهور يبدى عندو ألعاب مفضلة يحب يلعب بيها أكثر ويبدى ديما يلوج عليها, بالشوية ومع تطور الفهم عند صغيرك يولي يميل لألعاب الذكاء المخصصة للأطفال.
2) الألعاب المناسبة للصغار:
اختيار الألعاب للصغار لازم يكون دقيق برشا, على خاطر ينجم يشكل خطر عليهم. الاطفال في عمر صغير يحبو يكتشفو كل شي من حولهم من خلال اللمس والا الفم, لذلك يلزمنا نتجنبو الالعاب الحادة والا اليابسة. كيما يلزمنا نتجنبو الالعاب البلاستيكية على خاطر فيها مواد ضارة للرضع.
بالنسبة لعدد الالعاب, ما يلزمش نقدمو للصغير أكثر من لعبة وحدة في في عمر شهر, و4 ألعاب كحد أقصى في عمر 9 شهور باش ينجم الصغير يتمعن في كل لعبة وياخو الوقت اللازم في اللعب بيها.
اختيار ألوان وأشكال الالعاب مهم برشا حسب العمر, الصغير يكتشف العالم من خلال الحاجات اللي تقدمهملو لذلك الالعاب اللي فيها أصوات الحيوانات أو أصوات أغاني اطفال تنجم تطور حاسة السمع عندهم وتعلمهم يميزو الاصوات, الالعاب اللي بألوان زاهية تخليهم يركزو أكثر. وأفضل الالعاب للأطفال في عمر أقل من 3 سنين هي اللي تكون مصنوعة من القطن أو القماش أو الصوف على خاطرها أمنة, تدوم أطول وقابلة للغسل.
سارة البلومي
