مهرجانات ليالي رمضان
كلنا نعرفو لي رمضان متسمي عاللمة و الجو قبل شقان الفطر و القعدة مع العايلة على طاولة الافطار. لكن ما لازمناش ننساو انو شهر رمضان مش فقط بش نتلهاو فيه بالكوجينة و الماكلة و ننساو الوقت متاع التفرهيد و المحواس، لي ينجم يعاونا في عملية الهضم.
و بما انو السهريات بدات و حلات أكثر مع شهر رمضان; حبينا نعطيوكم فكرة على البرمجة الموجودة في بعض الولايات بش تاخذو فكرة و تنسقو سهرية مزيانة مع العايلة و الأصحاب و الأحباب.
مهرجان المدينة بتونس من دورتو التسعة و التلاثين انطلق نهار 27 مارس و كان الافتتاح بعرض للفنانة ألفة بن رمضان بعرض فني طربي. العروض فيه بش تكون موزعة على أكثر من فضاء كيما دار الأصرم و الطاهر الحداد و بير الأحجار و المسرح البلدي و بش يكون عرض الاختتام مع الفنانة نبيهة كراولي تحديدا نهار 27 أفريل و بش تتنوع العروض ما بين عروض مالوف و المسرح.
في صفاقس مهرجان المدينة من دورتو 26 بش يفتتح بعرض فني للفنانة يسرى محنوش نهار 30 مارس بالمركب الثقافي محمد الجموسي و في الاختتام نلقاو عرض الفنان عدنان الشواشي و شكري بوزيان و نبيهة كراولي. في المسرح البلدي بصفاقس كيما بشتلقاو عروض مسرحية كيما عرض باسم “الجولة الأخيرة” اخراج حاتم الحشيشة و “جعفور” للممثل جعفر القاسمي و برشا فنانين توانسة كبار كيما صابر الرباعي و نهى رحيم و عرض سوري باسم عطور الشام و برشا عروض أخرى كيما التخميرة و المالوف.
و في المنستير عشاق السهرات الرمضانية بش يتمتعو بداية من يوم 6 أفريل الى يوم 17 أفريل بأكثر من 140 عرض من عروض موسيقية صوفية و مسرحية و طربية. و مالفنانين لي بش يكونو حاضرين في البرمجة الفنانة روضة عبد الله و نور الدين الباجي الى جانب عرض حكواتي مع صلاح مصدق و هشام درويش و عروض أخرى تكتشفوها.
برمجة متنوعة و ثرية تشجعنا بش نخرجو بعد شقان الفطر نسرحو ساقينا و نعملو “كيف” عالعروض سواء طرب ولا مسرح ولا العروض الصوفية، في جو عائلي مع الصغار و الأصحاب.
