معلمين توانسة إستثنائيين !
معلمين و أساتذة توانسة كانو ضيوف شبكة إنجح هوما اللي حبو يخليو بصمة في المهنة اللي إختاروها و قررو أنهم يبتكرو طرق جديدة للتعليم.
1-أريج ضميد
هي المعلمة اللي ورات خدمتها و شاركت فيديوهات على مواقع التواصل الإجتماعي اللي تعلم في الصغار التربية الجنسية و تعلم فيهم يحبو رواحهم و يقبلو الإختلاف كيفما هوما بعد ما صارت حادثة تنمر في القسم قدامها.
2-نبيل خليفي
نبيل معلم من ولاية سيدي بوزيد هو اللي يحب يخرج على المألوف ولو بطريقة بسيطة وماسألش الصغار في حصة التعارف على أمهم و بوهم شنية يخدمو؟ لكن سألهم شنية يحلمو و شنية الخدمة كيف يكبرو يحبو يخدموها و فاجئهم في الحصة اللي من بعد بلافتات فيها المهن متاعهم.
3-حمزة الغضبان
معلم في عمر ال24 سنة اللي إختاروه المدرس المثالي بإفريقيا لسنة 2021 هو اللي بادر بتقنية الميتاكلاس واللي جدد قسم بأحدث الأدوات التكنولوجية. في قسم حمزة التلامذة يقراو ب Tablettes, صبورة تفاعلية, إنترنتت و حواسيب. حمزة إختار أنو يكون معلم إستثنائي والجائزة اللي خذاها خصص ثلثين منها لتجديد القسم.
وأنت شكون المعلم اللي خلى فيك أثر و ماتنساهوش ؟ باش تعرفو أكثر تفاصيل تفرجو في الفيديو .
بلسم العابد